Sońǵy «jekeleı ýaqytqa» arnalǵan jarys kúni Mılanda kútpegen jaǵdaımen aıaqtaldy. Kezeń bastalar aldynda jalpy eseptiń kóshbasshysy Djeı Hındlı men 2-orynda turǵan brıtanııalyq Teo Geogan Harttyń arasyn birneshe sekýnd qana bólip turǵan-dy. Nátıjesinde, jekeleı jarys jalpy kópkúndiktiń taǵdyryn sheship ketti. Geogan Hart Hındlıge qaraǵanda, 39 sekýnd jyldam óner kórsetip, jalpy kezeń qorytyndysy boıynsha «Djıro d’Italııa 2020» velododasynyń jeńimpazy atandy. Hındlı 2-oryn ıelense, úzdik úshtik qataryn Nıderland ókili Vılko Kelderman tolyqtyrdy.
«Astana» velokomandasynan Fýlsang jalpy esepte úzdik ondyqtyń qatarynan kóringenimen, jerlesterimiz úshin ıtalııalyq Grand-týr jarysy sátti ótti dep aıta almaımyz. Velokópkúndiktiń bastalýyna birer kún qalǵanda «Astananyń» negizgi eki shabandozy – Mıgel Anhel Lopes pen Aleksandr Vlasov qatardan shyǵyp qaldy. Dál osy eki sportshynyń danııalyq veloshabandozdyń jalpy esepte jaqsy nátıje kórsetýine kómegi orasan zor edi. Al sońǵy aptada Manýele Boaronyń da jarysty jalǵastyra almaıtyny belgili boldy. Osyndaı qıyndyqqa qaramastan, «Astana» sportshylary ár kezeń saıyn joǵary orynǵa umtyldy.
Qazaqstandyq komandanyń veloshabandozdary birde-bir kezeńde jarys jeńimpazy atanbasa da, 9 márte úzdik ondyqtyń qatarynan kórindi. Al altynshy kezeńde 30 jastaǵy ıtalııalyq Fabıo Fellıne máre syzyǵyn úshinshi bolyp kesti. Al Iаkob Fýlsang 5-kezeńde toǵyzynshy, 9-kezeńde toǵyzynshy, 13-kezeńde jetinshi, 15-kezeńde toǵyzynshy jáne 18-kezeńde tórtinshi orynǵa ıe boldy. Osy nátıjesiniń arqasynda ol óziniń Grand-týrlardaǵy eń úzdik nátıjesine qol jetkizdi. Sondaı-aq 16 jáne 17-kezeńde «Astananyń» taǵy eki ókili Manýele Boaro men Oskar Rodrıges jarys kúnin toǵyzynshy jáne segizinshi orynmen aıaqtady. Jalpykomandalyq esepte «Astana» jigitteri toǵyzynshy boldy.
Aıta keteıik, 2013 jáne 2016 jyldary «Astanamen» birge «Djıro d’Italııa» jarysynda eki márte top jarǵan ıtalııalyq Vınchenso Nıbalı bul joly 7-orynǵa taban tirese, 2017-2019 jyldary elordalyq komandada óner kórsetken ıspanııalyq Pelo Bılbao dodany 5-orynmen qorytyndylady.
21-kezeńdegi jekeleı jarysta márege 31-bolyp kelgen Fýlsang sýperkópkúndikti qorytyndylap, jarys týraly oıyn ortaǵa saldy.
– Árıne, biz Italııaǵa qyzǵylt jeıdeni ıelený úshin kelgen edik. Alaıda jarys qorytyndysy boıynsha jalpy esepti 6-orynmen aıaqtadyq. Bul biz úshin óte aýyr jol boldy. Jarys bastalmaı jatyp ta, jarys barysynda da biraz qıyndyqqa tap boldyq. Jaqsy sátter de az bolǵan joq. Jalpy, bıylǵy báseke osylaı ótti. Árbir bólshegine deıin esepteý múmkin emes. Sondyqtan ylǵı da óz jumysyńdy 100% jaqsy atqarýyń kerek. Árqaısymyz qolymyzdan kelgenin istedik. Sońyna deıin kúrestik. Endi mine, Mılanda biz jarysty 6-shy bolyp aıaqtadyq. Árıne, básekeni jeńistiń eń bıik tuǵyrynda qorytyndylaǵym keldi. Biraq velosport degen osyndaı. Keıde jeńesiń, keıde jeńilesiń. Alda meni taǵy da kóptegen jarys kútip tur. Dál qazirgi sátte men demalys týraly jáne otbasymmen qalaı ýaqyt ótkizetinim jaıly oılap turmyn. Qıynǵa soqqan maýsymnan keıin biraz ýaqytty, kelesi jarystar bastalǵansha velosıpedsiz ótkizgim keledi, – dedi Iаkob Fýlsang.
