Búginde Qarajanbas táýligine Edil ózeninen Astrahan-Mańǵystaý sý qubyry arqyly keletin 17,5 myń tekshe metr sý kólemin paıdalanýda. Sý tushytý zaýytyn iske qosý ken ornyn sýmen qamtamasyz etip, aımaq halqynyń qajettilikteri úshin aıtarlyqtaı sý kólemin bosatýǵa múmkindik beredi. Oǵan qosa qurylys aıaqtalǵannan keıin taǵy 50-ge jýyq jańa jumys orny ashylady dep josparlanǵan. Sonymen qatar kásiporyndy iske qosý arqyly «Qarajanbasmunaı» AQ-yndaǵy birqatar tehnologııalyq máseleni sheshý jolyn tabady.
Atap aıtqanda 2021-2035 jyldary aralyǵynda «Qarajanbasmunaı» AQ ken ornyndaǵy munaı óndirisin keminde 700 myń tonnaǵa arttyrýdy, uńǵymalardy kúrdeli jáne jerasty jóndeýdi azaıtýdy, grıfondardyń paıda bolýyn shekteýdi josparlap otyr.
Osy oraıda koronavırýs pandemııasy saldarynan zaýytty iske qosý úshin qajetti qondyrǵylardy jetkizý merzimi sozylyp, qurylystyń tapsyrylýy ústimizdegi jyldyń jeltoqsan aıynan 2021 jyldyń 1-toqsanyna shegerilgenin aıta ketken jón.
Budan bólek baspasóz týry barysynda «Qarajanbasmunaı» AQ ekologııalyq jobalary jáne qorshaǵan ortany qorǵaý salasyndaǵy qyzmeti tanystyryldy. Kompanııanyń bul saladaǵy jańalyqtary men jospary týraly aıtyldy.
«Qarajanbasmunaı» AQ ótken jyly burynnan qalyptasqan tarıhı qaldyqtar máselesin birjolata sheshti. Kompanııa ýaqytsha saqtaý polıgonyndaǵy bar-joǵy 180 myń tonnadan astam qaldyqty kádege jaratypty. Atap aıtqanda 2010 jylǵa deıin – 104 tonna, 2010-2016 jyldary taǵy 43,8 tonna qaldyq joıyldy. Al 2019 jyly «Qarajanbasmunaı» AQ polıgonda qalǵan 36 myń tonna qaldyqty tolyǵymen kádege jaratqan bolatyn.
Kompanııa tabıǵatty qorǵaý sharalaryn jiti nazarda ustaıdy. Buǵan jyl saıyn aýqymdy qarjy bóledi eken. Mysaly, 2016 jyly 168 mln teńge bólinse, bıyl 479 mln teńgeden astam qarjy jumsaý josparlanyp otyr.
Eske sala ketsek, qazirgi tańda «Qarajanbasmunaı» AQ jalpy kólemi 350 gektar bolatyn munaımen tarıhı lastanǵan jerlerdi tazartý boıynsha is-sharalardy júzege asyrýda. Búginge deıin onyń 143 gektaryn tazalap úlgergen. Sonymen qatar kompanııa Kaspıı teńiziniń jaǵalaýy aımaǵynda 1970 jyldardyń aıaǵynda burǵylanǵan 11 uńǵymany japty.
Sol 2019 jyly «Qarajanbasmunaı» AQ jáne Ekologııa, geologııa jáne tabıǵı resýrstar mınıstrligi qorshaǵan ortany qorǵaý salasyndaǵy yntymaqtastyq týraly memorandýmǵa qol qoıǵan bolatyn. Qujatqa sáıkes «Qarajanbasmunaı» AQ enshiles kompanııalary – QBM, «Mańǵystaýmunaıgaz» AQ jáne «О́zenmunaıgaz» AQ – kelisimshart aıasynda munaımen lastanǵan jerlerdi tazalaý, sondaı-aq jabdyqtalmaǵan shlam jınaǵyshtarynda ornalastyrylǵan qaldyqtardy kádege jaratý jáne qaıta óńdeý jónindegi mindetterdi qabyldady.
Atyraý oblysy
