SQO PD qyzmetkerleri 44 jastaǵy Petropavl turǵyny júrgizip bara jatqan "Toyota Mark" avtokóligin toqtatqan. Onyń qasynda 1970 jyly týǵan serigi bolǵan. Kóliktiń júksalǵyshyn teksergende onda skotchpen oralǵan, ótkir ıisi bar ósimdik tektes zat salynǵan úsh qap tabylǵan. Saraptama qorytyndysyna qaraǵanda bul keptirilgen marıhýana bolyp shyqqan.
Alynǵan zattyń jalpy salmaǵy – 59 kıli 770 gramm bolǵan, bul asa iri kólemge jatady. Esirtkiniń jolaýshyǵa tıesili ekendigi belgili boldy. Onyń aıtýynsha, ol esirtkini belgisiz adamnan satyp alǵan.
Atalǵan fakti Qylmystyq kodekstiń "Esirtki, psıhotroptyq zattarmen, sol tektestermen, prekýrsorlarmen ótkizý maqsatynsyz zańsyz jumys isteý" atty 296-baby boıynsha Sotqa deıingi tergep-tekserýdiń biryńǵaı tizilimine engizildi. Kúdikti ýaqytsha qamaýda ustaý ızolıatoryna qamaldy, polıseıler bolǵan oqıǵanyń mán-jaıyn anyqtaýda.
"Bul jyl basynan alynǵan esirtkiniń eń iri kóleminiń biri. Jyl basynan beri barlyǵy 390 kg astam túrli esirtki zattary, onyń ishinde 1 kg 690 gramm sıntetıkalyq dári-dármek alyndy. Qylmystyq jaýapkershilikke 85 adam tartyldy. Oblysta mamyr men qazan aılary aralyǵynda ótip jatqan "Qarasora" JPISh aıasynda esirtkimen zańsyz jumys isteýdiń 120 faktisi anyqtaldy", - deıdi SQO PD bastyǵynyń orynbasary, polısııa polkovnıgi Rýslan Nazarov.
