«Qysqy soǵysqa» qatysqandardyń deregi tabyldy

«Qysqy soǵysqa» qatysqan qazaqstandyq soldat Amantaev Muhambetqalıdiń nemeresi Jumabek Mýsın áleýmettik jeli arqyly tabyldy.

Soldat týraly qysqasha aqparat: Amantaev Muhambetqalı. Týǵan jyly: 1918 j. 1938 jyly áskerge shaqyryldy. Qaza bolǵan kúni: 12.03.1940. Týǵan jeri: QazKSR, Aıyrtaý aýdany, «Novyı byt» kolhozy. Áskerı bólimshe: 181 atqyshtar polky, 43-atqyshtar dıvızııasy, atqysh. Klıost aralyn shabýyldaý kezinde qaza boldy.

«Osy jyldyń qyrkúıek aıynda «Atamnyn Amanaty» qoǵamdyq birlestigine «Lenıngradtyq eriktiler» patrıottyq tárbıe berý boıynsha aǵartýshylyq ortalyǵynyń avtonomdy kommersııalyq emes uıymy habarlasty. RF, Lenıngrad oblysy, Vyborg aýdany Klıost aralynda qazaqstandyq soldattardyń súıegi tabylǵany týraly aıtty. Aqparatty estigen soń biz birden jaýyngerlerdiń týystaryn izdeýge kiristik. Alǵashqy nátıjelerimiz osyndaı», – dedi «Atamnyn Amanaty» qoǵamdyq birlestigi basqarma tóraǵasynyń orynbasary Raıgúl Mushanova.

Soldattardyń súıegi 2020 jyldyń mamyr aıynda araldy mınasyzdandyrý barysynda tabylǵan. Izdeýshilerdiń aıtýynsha, 324 jaýyngerdiń súıegi tabyldy. Olardyń altaýy – bizdiń otandasymyz. Osy jyldyń 24 qazanynda batyrlardy məńgi este saqtaý maqsatynda Klıost aralynda memorıal ornatyldy.

«Biz atamyzdy Keńes zamanynan beri uzaq ýaqyt boıy izdedik. Ás­kerı komıssarıattar arqyly aqparat qarastyrdyq, sodan keıin Reseı Federasııasynyń Qorǵanys mınıstrligi arqyly izdedik, sosyn Lenıngrad oblysynyń mýnısıpalıtetterine habar­lasyp, atamyzdyń qaza bolǵan jerin bildik. Al jerlengen jeri týraly aqparat bolmaǵan edi. Amantaev Muhambetqalıdiń úsh balasy bolǵan – qyzdary Darjan men Balken jáne uly Tas­ǵa­lı», – deıdi qazaqstandyq jaýyngerdiń nemeresi Jumabek Mýsın.

«Maǵan «Kosmos» jáne «Keńestik patrıot» atty eki izdeý jasaqtary habarlasty. Gýbernatordyń ultaralyq qaty­nas­tar jónindegi keńesiniń múshesi retinde maǵan Lenıngrad oblysyndaǵy Dostyq úıiniń negizinde Klıost aralynda tabyl­ǵan barlyq jaýyngerlerdiń týystaryn izdeý jumystaryn uıymdastyrýǵa kómektesetin jumys tobyn qurý týraly ótinish aıtyldy. Qazaqstandyq jaýynger Muhambetqalı Amantaev týraly aıtatyn bolsam, bul jerde meniń tanystarym kómektesti. Sebebi jubaıym Qazaqstan Respýblıkasynyń týmasy. Oǵan jerlesterin tabý máselesi óte mańyzdy», – deıdi Lenıngrad oblysynyń gýbernatory janyndaǵy ultaralyq qatynastar keńesiniń múshesi German Vladımırov.

«Atamnyn Amanaty» qoǵamdyq birlestiginiń izdeýshisi Altynshash Syzdyqova tabylǵan qazaqstandyq soldat Muham­betqalı Amantaevtyń nemeresi Jumabek Mýsındi áleýmettik jeliler arqyly tapty. Jaýyngerdiń inisiniń qyzy Klıost aralynan tabylǵan otandastarymyzdy izdeý týraly habarlamany kórip, nemeresine habarlasty.

Eske sala keteıik, «Atamnyn Amanaty» qoǵamdyq birlestigi 1940 jyly fınderge qarsy «Qysqy soǵysqa» qatysyp, osy kúnge deıin iz-túzsiz ketti dep eseptelgen qazaqstandyq jaýyn­gerlerdiń týystaryn izdeıdi:

1. Nýgımet Djamantaev. Týǵan jyly: 1918 j. Qaza bol­ǵan kúni: 11.03.1940. Týǵan jeri: QazKSR, Gýrev oblysy, Novo­bogatınskıı aýdany, Raınareýd kenti. Áskerı bólimshe: 181-atqyshtar polky, 43-atqyshtar dıvızııasy, atqysh.
2. Bazarbaı Mýhambetov. Týǵan jyly: 1917 j. Qaza bolǵan kúni: 11.03.1940. Týǵan jeri: QazKSR, Gýrev oblysy, Maqat aýdany, Dossor. Áskerı bólimshe: 181-atqyshtar polky, 43-atqysh­tar dıvızııasy, pýlemetshi.
3. Beken Sadýov. Týǵan jyly: 1917 j. Qaza bolǵan kúni: 11.03.1940. Týǵan jeri: QazKSR, Aqmola oblysy, Eńbekshilder aýdany, Iýshmına kolhozy. Áskerı bólimshe: 181-atqyshtar polky, 43-atqyshtar dıvızııasy, atqysh.
4. Kýrbeks Selharovıch Serkbaev. Týǵan jyly: 1917 j. Qaza bolǵan kúni: 12.03.1940. Týǵan jeri: QazKSR, Gýrev oblysy. Áskerı bólimshe: 181-atqyshtar polky, 43-atqyshtar dıvızııasy, atqysh.
5. Hasbaı Dıýsengalıevıch Týralıev. Týǵan jyly: 1918 j. Qaza bolǵan kúni: 12.03.1940. Týǵan jeri: QazKSR, Gýrev oblysy, Promsolbaksýnskıı aýyldyq keńesi. Áskerı bólimshe: 181-atqyshtar polky, 43-atqyshtar dıvızııasy, atqysh.