Kollajdy jasaǵan Qonysbaı ShEJIMBAI, «EQ»
Prezıdent osy Jarlyqqa oraı halyqqa joldaǵan úndeýinde partııalyq tizimge jastar úshin 30 paıyzdyq kvota engizilgenin atap ótti. Bul – jastarǵa berilgen úlken múmkindik, memlekettik qoldaý.
Jastar – qoǵamnyń qozǵaýshy kúshi, izgilikti isterdiń belortasynda júrgen býyn ókilderi. Azamattyq kózqarasyn ashyq aıtyp, qoǵamdyq jumystarǵa belsene aralasyp júrgen jastardyń zań shyǵarýshy minbeden, memlekettik mańyzy bar sharalardan tóbe kórsetip, ıgi isterdiń basy-qasynda bolýy óte quptarlyq is. Bul – azamattyq qoǵam qalyptastyrýǵa jasalǵan qadam.
О́skeleń urpaq elimizdiń órkendeýi men damýyna qosar úlesi aıryqsha. О́ıtkeni bolashaqqa umtylý, janqııarlyqpen jumys isteý, ónimdi eńbek etý, t.b. sıpattar jastarǵa tán tabıǵı qubylystar. Jas býynnyń ózine tán osyndaı áleýetin qajetti ýaqytta, tıisti orynǵa sarp etý durys oıdan, ádil sheshimnen týǵan bastama der edik.
Qazaqstan Respýblıkasynyń Prezıdenti Qasym-Jomart Kemeluly Toqaev Parlament Májilisi men máslıhat depýtattary saılaýyn taǵaıyndaý týraly halyqqa joldaǵan úndeýinde: «Bizdiń ortaq mıssııamyz – Qazaqstandy órkendetý, azamattarymyzdyń ıgiligi úshin qyzmet etý. Qazaqstan halqy asa mańyzdy tarıhı syndarly sátterde bir jeńnen qol, bir jaǵadan bas shyǵara bildi. Halqymyz osy joly da elimizdi jan-jaqty jańǵyrtý baǵytyndaǵy jańa tarıhı mıssııasyn laıyqty atqarady dep senemin. Táýelsizdiktiń 30 jyldyǵy qarsańynda elimiz kemeldene túsip, damýdyń jańa kezeńine shyǵatynymyz anyq. Memleketimizdiń barlyq azamattaryn belsendi azamattyq ustanymyn tanytýǵa, Parlament Májilisiniń jáne máslıhattardyń aldaǵy saılaýyna uıymshyldyqpen qatysýǵa shaqyramyn» dedi.
Birlikke umtylǵan ult qashanda ıgilik pen nyǵmetke bólenedi. Syndarly sátte halyqqa asa qajet, barshaǵa ortaq qundylyq – birlik. Rasynda, Allanyń aldynda súıkimdi adamdar eldi birlikke shaqyrǵandar, alaýyzdyqqa jol bermegender. Eki dúnıeniń baqytyna jeteleıtin Quran kárimniń «Hýjýrat» súresinde: «Eı, adamdar! Negizinde, Biz senderdi bir er jáne bir áıelden jarattyq ári senderdi bir-birlerińdi tanyp, bilýleriń úshin halyqtar men rýlar etip jasadyq. Anyǵynda Allanyń aldyndaǵy senderdiń eń qurmettileriń taqýalaryń», delingen.
Alla taǵala halqymyzdyń yrys-nesibesin molaıtyp, aýyzbirshiligin arttyrǵaı. Táýelsizdigimizdi máńgilik etip, bolashaqqa basqan qadamymyzdy berekeli etkeı! Tilegimiz qabyl, muratymyz asyl bolǵaı! Ámın!
Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy,
Bas múftı
