О́skeleń urpaqty otansúıgishtikke tárbıelep, olardyń tanym-talǵamyn ult rýhanııatyna baǵyttaýdy kózdeıtin sóz zergerleri saıysynyń alǵashqy aınalymyna 14 adam qatysyp, aqtyq kezeńge 4 stýdent joldama aldy. Olardyń qatarynda ál-Farabı atyndaǵy Qazaq ulttyq ýnıversıtetiniń stýdenti Nurbol Jaýynbaev, S.Amanjolov atyndaǵy Shyǵys Qazaqstan ýnıversıtetiniń stýdenti Ardaq Adalbek, S.Báıishev atyndaǵy Aqtóbe ýnıversıtetiniń stýdenti Zlıha Naýryzalına jáne H.Dosmuhamedov atyndaǵy Atyraý ýnıversıtetiniń stýdenti Jasar Nurdanbekuly bar.
Shara Qyzdar ýnıversıtetiniń rektory Gaýhar Aldambergenovanyń quttyqtaý sózimen ashyldy.
– Bıyl uly aqyn, dala kemeńgeri Abaı Qunanbaıulynyń 175 jyldyǵy elimizde keńinen atalyp ótilýde. Abaıǵa bet burý, «ótkenniń arty, jańanyń basy edim» degen uly aqynnyń taǵylymyna tereń boılaý – búgingi kúnde úlken mańyzǵa ıe. Abaı – ulttyq bolmystyń aıqyn úlgisi. Abaı – dala danalarynyń barsha jaqsy qasıetteri men asyl muralaryn boıyna sińire otyryp, ult ádebıeti men mádenıetin baǵa jetpes qazynalarmen baıytqan dana da dara tulǵa. Abaı – adamzatqa ortaq kemeńger. Uly oıshyldyń shyǵarmalarynyń 30-dan astam tilge aýdarylyp, ómirsheń óleńderi men pálsapalyq oılary álemdik ádebıettiń altyn qoryna enýi bul sózimizge aıqyn dálel, – dedi Gaýhar Aldambergenova.
Ýnıversıtet basshysy kemeńgerdiń toıy oıdyń toıy bolýy qajet ekendigin atap ótti.
– Kemeńgerdiń toıy oıdyń toıy bolýy qajet. Uly Abaıdyń toıy taǵylymnyń toıy bolýy tıis. Osyǵan oraı Qyzdar ýnıversıtetiniń danyshpannyń mereıtoıyna oraı respýblıkalyq jas aqyndar aıtysyn ótkizýdi uıǵardy. Basty maqsat – jastardyń órnekti sózderi men óreli óneri arqyly el muraty men qundylyqtaryn nasıhattaý. Kelisti de kesteli sózdi janyna serik etken alamanǵa qatysýshylarǵa tabys jáne jeńis tileımin! Kemeldik kiltin usynǵan Abaı murasy jańǵyra bersin, – dedi óz sózinde Gaýhar Tóremuratqyzy.
Aıtys barysynda aqyndar «Abaı – dana, Abaı – dara», «Rýhanı jańǵyrý – basty baǵdar», «Týǵan jer – turǵan jermen ólshenbeıdi», «Ana tilim – ardaǵym», «Táýelsizdik – tuǵyrym» taqyryptary boıynsha sóz jarystyrdy.
Ulttyń ulylyǵyn ulyqtap, tól mádenıetimizdiń mereıin arttyrýǵa sep bolǵan sóz saıysynda Nurbol Jaýynbaev úzdik atanyp, baıqaýdyń bas júldesin qanjyǵasyna baılady. Birinshi oryn Jasar Nurdanbekulyna berilse, ekinshi oryn Zlıha Naýryzalınaǵa buıyrdy. Al júldeli úshinshi orynǵa Ardaq Adalbek laıyq dep tanyldy.
Jeńimpazdar men júldegerler Qyzdar ýnıversıtetiniń rektory Gaýhar Aldambergenovanyń «Alǵys hatymen», arnaıy dıplomdarmen jáne «Atamura» korporasııasynyń prezıdenti Raqymǵalı Qul-Muhamed pen «Tasgroup» kompanııasynyń basqarýshysy Dýlat Tastekeev taǵaıyndaǵan syıaqylarymen marapattaldy.
Alaman aıtysqa qatysýshylardyń ónerin Talant Arynǵalı, Saıat Qamshyger, Lázzat Igisin syndy tanymal aqyndar baǵalap, jyr dodasyna qazylyq jasady.
Osy oraıda aıta keteıik, óner saıysynyń joǵary deńgeıde ótýine Qyzdar ýnıversıtetiniń Fılologııa ınstıtýtynyń qosqan úlesi mol. Instıtýt dırektory Tynyshtyq Ermekovanyń aıtýynsha, hákim mereıtoıyna arnalǵan óner jarysynyń maqsaty – Abaı muralary arqyly ult ádebıetiniń tabystaryn jáne táýelsizdik jyldary qol jetken jetistikterdi dáripteý.
– Baıtaǵy – syrǵa, kómeıi – jyrǵa tunǵan Uly dalanyń tósinde san ǵasyrlar boıy tól rýhanııatymyzdyń sarqylmas qazynasyna aınalǵan qundylyqtar qalyptasty. Ulttyq bolmysymyz ben aıqyn nyshanymyzǵa aınalǵan dara dástúrimiz paıda boldy. Babadan balaǵa mırasqa aınalǵan mádenı muralarymyz eksheldi. Sonyń biri – aıtys óneri. Aıtys – dáýirlermen qanattasyp, ǵasyrlarmen úndesip, zamanalarmen tildesip kele jatqan uly óner. Aıtys – qazaqtyń qanyna sińgen bekzat ıakı biregeı dúnıe. Bul óner – dala fılosofııasymen sabaqtasyp, qanattasyp jatqan mádenı muralarymyzdyń biri hám biregeıi retinde ult qazynasynyń qataryna endi, – dep atap ótti Qyzdar ýnıversıtetiniń Baspasóz jáne qoǵammen baılanys bóliminiń jetekshisi Jandar Asan.
ALMATY
