«Urpaq next» qoǵamdyq qorynyń basshysy Gúljanat Muratbaıdyń aıtýynsha, Eýrazııa qory úkimettik emes uıymdardyń áleýetin kóterý maqsatynda arnaıy grant bólgen. Onda Mańǵystaýdyń «Urpaq Next» qoǵamdyq qory jeńimpaz atandy.
– Bıyl qazan aıynan bastalǵan joba 2021 jyldyń sáýir aıyna deıin júzege asady. Joba múmkindigi shekteýli áıelderdi jumyspen qamtyp jáne kásipkerlikpen aınalysýǵa kómektesedi. Buǵan 18 ben 45 jas aralyǵyndaǵy óńirde turatyn múmkindigi shekteýli qyz-kelinshekter men erekshe bala tárbıelep otyrǵan analar qatysa alady, – dedi G.Muratbaı.
Joba aıasynda mamandar múmkindigi shekteýli qyz-kelinshekterge quraq quraý, kondıter, vızajıst, SMM mamany boıynsha onlaın kýrs ótkizedi. Keıin kýrsqa qatysýshylar óz kásibin ashý, basqarý, marketıng, satý, jeke brendti qalyptastyrý, áleýmettik jelilerdi tıimdi paıdalaný, memlekettik baǵdarlamalar men sýbsıdııa alý sekildi taqyryptardy qamtyǵan bıznes kýrsynan ótedi.
Málimetter Mańǵystaý oblysynda 27 481 múmkindigi shekteýli adam turatynyn kórsetedi. Onyń 56%-y eńbekke qabiletti sanalady. Basty maqsat nátıjeli jumyspen qamtý baǵyty bolǵandyqtan, turǵylyqty jerde jumysqa ornalasýǵa nemese óz kásibin ashýǵa atalǵan qoǵamdyq qor múmkindiginshe yqpal etedi.
Janashyr bolyp, birin-biri qoldap júrý – azamattyqtyń, adamgershiliktiń belgisi. Al múgedek jandarǵa kómek qolyn sozý jaqsylyqtyń da jaqsylyǵy bolmaq.
Mańǵystaý oblysy
