Án bar – ánshi bar. Ánshiniń sheberligi – ándi halyqtyń júregine uıalatatyndaı etip oryndaýyna baılanysty ekendigi daýsyz aksıoma. Endeshe, Ǵarıfollanyń kemeline keltire oryndaǵan «Aınamkóz», «Úlken aıdaı», «Aq kerbez», «Ismet», «Boz jorǵa», «On alty qyz» t.b. halyq ánderiniń oryndaý stıli buzylmaı búgingi kúnge jetkendigi osy Ǵarekeńniń arqasy emes pe?!
Qazaq óneriniń tarıhynda E.Brýsılovskııdiń «Er Tarǵyn», «Aıman – Sholpan», «Qyz Jibek», M.Tólebaevtyń «Birjan – Sara», A.Jubanov pen L.Hamıdıdiń «Abaı» operalarynda kúrdeli partııalardy alǵash ret shyrqaǵan da osy Ǵarekeń.
Ǵarıfollanyń ánshilik oryndaý sheberligin qaıtalaýǵa bolatyn shyǵar, biraq asyp túsý múmkin emes degen oıdamyn. Onyń oryndaǵan ánderinen naǵyz qazaqtyń bolmys-bitimin kórýge bolady. Án oryndaǵanda daýsy Alataýdyń bıik shyńynan asyp sheksizdikke sińip jatqandaı sezimge bólenesiz. Kóz aldyńa qazaq halqyna tán býyrqanǵan daýyldy teńiz, julqyna shapqan at, jaıylǵan sheksiz sary dalada tolqyǵan aq seleý men ańqyǵan jýsan ıisi elestep, eriksiz sezim týdyrady. Syńsý joq, qulshynǵan qaırat pen alyp kúsh baıqalady.
Zamanymyzdyń kórnekti mýzyka mamany, kompozıtor Nurǵısa Tilendıev óziniń bir esteliginde Ǵarıfollanyń aýzynan estigen: «Men ándi Muhıttyń nemeresi Shaıqynyń atyna mingesip júrip, dál ózinen úırendim» degenin aıtady. Demek, Ǵarıfolla ánshi Muhıttyń ónerin dál bastaý-bulaǵynan úırenip, búgingi urpaqqa jalǵastyratyn ánshiler tobyn tárbıelep,izba-sarlaryn daıyndap ketkeni.
Ánshiniń tól shákirtteriniń biri Bóribaı Karten alǵash ret Aqtóbe oblysynyń Mártók aýdanynda Qambar Medetov atyndaǵy óner mektebiniń qabyrǵasynda dástúrli ánshiler synybyn ashyp, ánshi murasyn jalǵastyrsa, dástúrli ánshiler Sáýle Janpeıisova, Aıgúl Qosanova t.b. sahna tórinde Ǵarıfollanyń ánshilik ónerin damytýda. Mine, sol sebepti maqala avtory kórsetkendeı ulylardy ulyqtaýmen aınalysatyn tıisti mekemeler men jaýapty adamdar gazette kóterilgen usynystardy eskerip, tizimdi tolyqtyryp, halyq pikirine de qulaq asyp otyrsa deımiz.
Jaqsat QARLYǴAShOV,
ólketanýshy
