Arada úsh jyl ótse de shahandyqtar áli kúnge deıin jylýǵa jarymaı otyr. Álbette, jergilikti bılik qol qýsyryp qarap otyr deýden aýlaqpyz. Bul baǵytta alǵa birshama jyljý bar. Mysaly, qazir Shahan kentinde ortalyqtandyrylǵan jylý qazandyǵynyń qurylysy qarqyndy júrip jatyr. Munda quramy 50 jumysshydan turatyn brıgada kún-tún demeı jumys isteýde. «О́ńirlerdi damytý» baǵdarlamasy boıynsha bastalǵan qazandyq qurylysyn kelesi jyly aıaqtap, paıdalanýǵa berý josparlanǵan.
Jylý qazandyǵy qurylysymen aınalysýshy merdiger kompanııasynyń basshysy Ámir Dáýletalıev nysannyń zamanaýı, energııalyq tıimdiligi joǵary tehnologııa boıynsha salynyp jatqanyn aıtty. Iаǵnı bul joba kómirdiń kez kelgen túrin paıdalanýǵa múmkindik beredi.
– Jańa nysanda úsh qazandyq bar. Qazir biz ǵımarattyń tóbesin jabýdy aıaqtap qaldyq. Aldaǵy aptada qajetti jabdyqtardy ornata bastaımyz. Kelesi jyly jylý trassasyn tartyp, nysannyń aınalasyn abattandyrýdy qolǵa alamyz, – deıdi qurylys kompanııasynyń bas dırektory.
Mamannyń aıtýynsha, qazandyqtyń qýaty búkil aýylǵa 35 gıgakalorııa berýge qaýqarly bolady. Tipti bolashaqta kentte jańa úıler salynsa, olardy da jylýmen tolyqqandy qamtamasyz etýge múmkindik týady.
Atalǵan kentte jylý máselesinen basqa da problemalar bastan asady. Máselen, 8 myńnan asa turǵyny bar eldi mekende qańyrap bos turǵan ǵımarattar az emes. Eger istiń qııýyn tabar uıymdastyrýshy adam bolsa, munyń bárin iske jaratýshy edi. «Bos turǵan ǵımarattardy jóndep, olarǵa balabaqshalar men bilim berý mekemelerin ornalastyrsa» degen tilek aıtady jergilikti turǵyndar. Eldi mekendegi káriz júıeleri de eskirgen, aıyrbastaýdy qajet etedi.
Kentte aýyl turǵyndary úshin qysta sportpen aınalysatyn nysan atymen joq. Munyń ózi aýyl jastarynyń keshke taman bos sendelip júrýine ákep soqtyrady. Qazir jergilikti polısııa bóliminde basshy da tabylmaı tur. Bul jaǵdaı qylmys deńgeıiniń ósýine tikeleı áser etýi múmkin.
Sol sekildi Shahandaǵy basty problemanyń biri – jeke sektordaǵy ınternettiń álsizdigi. Osynyń saldarynan balalar onlaın rejimindegi oqý barysynda qıyndyqtarǵa tap bolyp júr.
Búginde Shahan kentiniń máselesi – oblys basshylyǵynyń tikeleı nazarynda. Aldaǵy ýaqytta eldi mekenniń barlyq problemasy eskerilip, olardy sheshýdiń tıimdi joldary qarastyrylmaq.
Qaraǵandy oblysy
