Bul «Imamdar úıi» negizinen elimizdegi tatýlyq pen birlikti nyǵaıtý, otbasy qundylyqtaryn nasıhattaý, asyl dinimizdiń sharttaryn tolyq bilý maqsatynda salynǵan. Munda ońaltý, beıbitshilik pen kelisim bólmeleri, ózge ult ókilderine qazaq tilin úıretý synyby jáne dárishana, kitaphana, medısınalyq pýnkt, májilis zaly bar. Sonymen qatar, ashana men jataqhana da bar. Qordaı aýdanynyń bas ımamy Dáýren Quttybaevtyń aıtýynsha, atalǵan ortalyq kóptiń kómegimen turǵyzylǵan. «Ejelden ata-babalarymyz birlikpen tirlik qylyp, yntymaqpen kún keshýdi ósıet etip qaldyrdy. Mine, osy maqsatta kishipeıildilikpen, tatýlyqpen ómir súrýdi dáriptedi. Ata-babalarymyzdyń urpaǵyna ósıeti jańǵyryp tursyn degen nıetpen «Imamdar úıi» salyndy», deıdi ol.
Resmı ataýy osylaı bolǵanymen, aýyl jastary bul ortalyqtan jan-jaqty bilim men tárbıe alyp shyǵady. Eńseli ári zamanǵa saı jabdyqtalǵan, tek kópshilikke paıdasy bar is-sharalardy uıymdastyrýǵa arnalǵan ǵımarat búginde aýyldyqtardyń jıi bas qosatyn jerine aınalǵan. Sondaı-aq eldiń keleli keńes ótkizip, kúrdeli máselelerdi talqylaıtyn ortasyna aınalmaq.
Sol sııaqty, munda otbasylyq qıyn jaǵdaıǵa túskendermen de tıisti jumystar júrgiziledi.
Jambyl oblysy
