MÁMS aıasynda elordanyń medısınalyq mekemeleri profılaktıkalyq tekserý, konsýltatıvtik-dıagnostıkalyq jáne stasıonarlyq kómek, sondaı-aq qalypqa keltirý emi boıynsha qyzmet kórsetti. Bul týraly arnaıy brıfıngte qalalyq qoǵamdyq densaýlyq saqtaý basqarmasynyń basshysy Tımýr Muratov málimdedi.
Onyń aıtýynsha, jyl basynan beri KT jáne MRT, medısınalyq-genetıkalyq zertteýler sııaqty medısınalyq qyzmettiń qymbat túrleri BMSK dárigeriniń joldamalary boıynsha barlyq pasıentke tegin kórsetildi.
Sondaı-aq qańtar aıynan bastap, ambýlatorııalyq deńgeıde usynylatyn dárilik zattardyń tizimi kóbeıdi. Atap aıtqanda bul tizimge 29 eresek jáne 53 balalar aýrýlary boıynsha jańa nozologııa engizilgen.
"Áleýmettik medısınalyq saqtandyrý qory" KeAQ elordalyq fılıalynyń dırektory Nurlybek Qabdyqaparov atap ótkendeı, naýqastarmen turaqty keri baılanys júrgiziledi.
– Baılanys-ortalyǵyna 1406 nómiri arqyly azamattardyń ótinishteri men shaǵymdary qabyldanady. Medısınalyq qyzmet kórsetý máseleleri boıynsha qordyń Nur-Sultan qalasy boıynsha baılanys ortalyǵynda 2020 jylǵy 1 qańtar men 1 qarasha aralyǵynda 92 241 ótinish tirkelgen, olardyń barlyǵyn bólim mamandary qaraǵan, – dedi N.Qabdyqaparov.
MÁMS júıesindegi óz mártebeńizdi resmı servıster arqyly – ÁMSQ saıtynda (fms.kz), "Qoldau 24/7" mobıldi qosymshasynda, Telegram-daǵy Saqtandyru-bot-ta tekserýge bolady. "Qoldau 24/7" qosymshasyn júktep alyp, ótinish, alǵys, usynys qaldyrýǵa bolady. Mindetti áleýmettik medısınalyq saqtandyrý jáne medısınalyq qyzmet kórsetý máseleleri boıynsha keńes alý da múmkin.
