«Qazsýshar» MKM Aqmola oblystyq fılıalynyń dırektory Ýálı Dáli atalǵan sý qoımasyn tilshilerge tanystyryp, onyń aldaǵy kóktemgi sý tasqyny kezeńine daıyn ekenin málimdedi. Degenmen tıisti sharalardy talap etetin máseleler de barshylyq eken.
«Esil ózeninde ornalasqan Astana sý qoımasy 1970 jyly salynǵan. Sý ótkizý qýaty – sekýndyna 1910 tekshe metr. Qazir 328 mln tekshe metr sý jınadyq, ıaǵnı 80%-ǵa tolǵan. Paıdalanýǵa berilgenine 50 jyl boldy desek, sý qoımasy úshin bul – kóp ýaqyt. Jibek joly aýyly men 42-razezd aýmaǵyndaǵy Esil ózeni arnasynyń sý ótkizý qýaty edáýir tómendep ketti. Buǵan ýaqytsha salynǵan qubyrly ótkelder men sýdyń baldyrlarǵa tolyp ketýi sebep. Sondyqtan jergilikti atqarýshy organ ózen arnasyn tazalap, aýyldardyń aınalasyna bóget salýy kerek», dedi Ý.Dáli.
Sý tasqyny kezeńindegi tótenshe jaǵdaılardyń aldyn alý úshin Qazsýshardyń Aqmola oblystyq fılıaly jyl saıyn «Qazgıdromettiń» bergen málimetteri boıynsha Esil basseındik sý ınspeksııasynyń bekitýimen qalaǵa sý jiberýdiń boljamdy kestesin jasaıdy. Bul Nur-Sultan qalasy ákimdigimen kelisiledi.
«Kún saıyn sý kólemin eseptep otyramyz. «Astana sý arnasy» mekemesi Nur-Sultan qalasy úshin jylyna 80-90 mln tekshe metr kóleminde sý alady. Al Arshaly aýdanyndaǵy birneshe aýylǵa aıyna 40 myń tekshe metr sý beriledi. Sonymen qatar elordadaǵy Esil ózeniniń deńgeıin ustap turý úshin sanıtarlyq sý jiberemiz», dedi fılıal basshysy.
«Qazsýshar» RKM Aqmola oblystyq fılıaly balansynda 7 sý qoımasy bar. Olar – Astana, Esil, Sileti, Chaglınskoe jáne Podlesnenskoe sý qoımalary. Elordany sý tasqynynan qorǵaý úshin 2010 jyly qorǵanys bógeti salynǵan.
