Shekteý sharalaryna baılanysty dóńgeletip otyrǵan kásipteri turalap qalǵandyqtan, 50-den asa semeılik kásipker shahar basshysy Ermak Sálimovpen kezdesip, narazylyqtaryn bildirdi.
Kezdesýde qala basshylyǵy indettiń oblys aýmaǵynda taralý qarqyny tyıylmaı turǵanyn aıtyp, qandaı da bir bosańsýlar men jeńildikter bolmaıtynyn kesip aıtty. Onyń ústine Shyǵys Qazaqstan «qyzyl aımaqqa» engizilgen. Sonymen qatar kásipkerlerdiń óz bedelderi men senimderine ózderi nuqsan keltirip otyrǵany da sóz etildi. Ekinshi tolqyn kezinde naýryz-maýsym aılaryndaǵydaı qatań sharalar qabyldanbady. Sonyń ózinde kásipkerler sanıtarlyq talaptardy saqtamaı, tártip buzýǵa jol berip otyr.
Máselen, Semeı meıramhanalarynyń birinde úılený toıy uıymdastyrylǵan. Onda tanymal sportshylar, óner adamdary, kóshbasshy jastar, bıznesmender men shoýmender jınalǵany belgili. Bir qyzyǵy, ruqsat etilmegen saltanatty merekege qatysqandardyń keıbireýleri – koronavırýspen aýyryp shyqqandardyń qatarynda.
Qala ákiminiń aıtýynsha, barlyq erejelerdi saqtaý qajettigi týraly jerlesterge úndeý tastalǵan. Alaıda sanıtarlyq shekteýlerge qaramastan toı ótkizilgen.
О́kinishke qaraı mundaı jaǵdaı bireý ǵana emes. Jer-jerlerde qurylǵan monıtorıngtik top kóptegen zańbuzýshylyqty anyqtady. Qanshama hattama toltyryldy.
Osy kezeńde barlyq kásipkerge ýaqyt pen adam sany boıynsha shekteýlermen, qashyqtyqty, maska taǵý rejimin jáne dezınfeksııalyq sharalardy saqtaı otyryp jumys isteýge ruqsat etildi. Soǵan qaramastan, keıbir bıznes ókilderi burynǵydaı jumys istep, karantındik shekteýlerdi jeńildetýdi talap etýde. Deı turǵanmen, «basty baılyq – densaýlyq». Sanıtarlyq talaptar jeńildetilgen jaǵdaıda COVID-19 aýrýynyń taralýy odan saıyn kúsheıýi múmkin.
Toqeteri, qala basshylyǵy Semeı kásipkerlerine COVID-19 jaǵdaıy turaqtalǵanǵa deıin jeńildiktiń bolmaıtynyn shegelep aıtty. Al shekteý sharalary oblystyń bas sanıtarlyq dárigeriniń qaýlysyna sáıkes 25 qarashaǵa deıin jalǵasady.
Semeı
