Osydan 9 jyl buryn, 2011 jylǵy 12 qarashada Taraz qalasynda bolǵan qanquıly shabýyl oblys turǵyndaryn ǵana emes, búkil eldi dúr silkindirdi. О́zin jıhadtyń jolyn ustaýshymyn dep sanaıtyn terrorıst aıdyń-kúnniń amanynda esh jazyǵy joq jeti adamdy, onyń ishinde ishki ister organdarynyń 3 polıseıi men Ulttyq qaýipsizdik komıtetiniń 2 qyzmetkerin mert qyldy. Úsh qoǵam saqshysy jaraqattandy.
Tula boıdy túrshiktirer osy oqıǵa kezinde tarazdyq beıbit turǵyndardyń ómirin saqtaý úshin qaraqshy atqan oq keýdesin tesip ótkenine qaramastan, jarylys jasaǵan terrorısti denesimen japqan jol polısııasynyń kapıtany Ǵazız Baıtasov erlikpen qaza tapty. Er el úshin týady jáne el úshin basyn báıgege tigedi.
Qarýly qylmyskerdi quryqtaý barysynda Ǵ.Baıtasovtan basqa mamandandyrylǵan kúzet qyzmeti basqarmasy jedel den qoıý vzvodynyń qyzmetkerleri, polısııa aǵa serjanty Polat Aıanqulov pen polısııa serjanty Jaqsybek Baıseıitov te erlikpen qaza tapty. Olar ómirleriniń sońǵy sáti soqqansha, el aldyndaǵy antyn adal oryndap, erlikpen kóz jumdy. Eshkim de erlikti batyr bolamyn, tarıhta qalamyn dep, eseppen jasamaıdy. Naǵyz adal azamat el tynyshtyǵyna, beıbit adamdar ómirine qaýip tóngen sátte táýekelge bas tigedi. Mundaı sátte erdiń eri, tipti aranyn ashqan ajalǵa da taısalmaı qarsy turady. Tarazdaǵy qandy oqıǵa kezinde jol polısııasy kapıtany Ǵ.Baıtasov sondaı bıikten tabyldy.
Kapıtan Ǵazız Taraz qalasynda Ábdibek Baıtasov pen Gúlzat Shirkeevanyń otbasynda dúnıege kelgen. Mektepti Jýaly aýdany Túımekent aýylynda bitirdi.Mektepten keıin Ǵazız Baıtasov Keńes áskeriniń qataryna shaqyryldy. 1992 jyly Jezqazǵan polıtehnıkalyq ýnıversıtetiniń Qarataý fılıalynyń syrttaı bólimine «Avtokólik sharýashylyǵy» fakýltetine oqýǵa túsedi. Keshki bólimde oqyp júrip jumysqa turady. Ákesiniń qaıtys bolýyna baılanysty Taraz qalasyna aýysyp kelip, syrttaı Qarataý tehnıkalyq kolledjin támamdaıdy. Keıinirek Ál-Farabı atyndaǵy Qazaq ulttyq ýnıversıtetin zańger mamandyǵy boıynsha aıaqtaıdy.
Eńbek jolyn 1993 jyly Jambyl oblystyq IIB ýaqytsha ustaý ızolıatorynyń aıdaýyl qyzmetinde bastady. Fakýltettegi oqýyna baılanysty 1996 jyly jol polısııasynyń ınspektory qyzmetine aýysqan edi. 2010 jyly Jambyl oblysy IID IIBB 1-vzvod komandıri bolyp taǵaıyndaldy. Polısııa kapıtany qyzmeti barysynda qylmyskerlerdi ustaý kezinde sheber is-áreketteri jáne jumystaǵy jaqsy kórsetkishteri úshin IID basshylyǵynyń alǵys hattarymen, baǵaly syılyqtarmen birneshe ret marapattalǵan.
Anasy Gúlzattyń aıtýynsha, Ǵazız mektepte óte belsendi bolypty. Árbir ótiletin is-sharanyń basy-qasynda qyzyl galstýk taǵyp, jalaýyn jelbiretken Ǵazız júredi eken. Jastaıynan eline, jerine degen sezimi erekshe, óz janyn adamgershilik, ádildik jolynda aıamaıtyn jan edi deıdi aǵaıyn-týystary. Otbasynyń jalǵyz uly artynan ergen úsh qaryndasyn jetildirip, aıaǵynan turyp ketýine kóp kómek kórsetken.
Eli úshin eńbek etip júrgen batyr ul qaıǵyly oqıǵa bolatyn kúni de tańerteń erte turyp, jumysyna asyǵyp ketken eken. Úıden shyǵar aldynda ádettegideı tátti uıqy qushaǵynda jatqan 11 jastaǵy Armanjany men 3 jasar Ádiljannyń mańdaıynan qushyrlana bir ıiskeıdi. Endi Qudaı qalasa, onshaqty kúnnen keıin kishi ulynyń súndet toıyn jasaıdy. Dostary men týystaryna shaqyrý bıletin óz qolymen taratyp shyqqan edi.
Kúndelikti qarbalas tirlik moıyn burýǵa mursha bermeıdi. Qystyń yzǵary biline bastasymen jol boıynda, kóshede kólik qozǵalysy qıyndaı bastaıdy. Bul jaýapkershilikti burynǵydan da kúsheıte túsýdi talap etedi. Jumysyn jaqsy biletin kapıtandy Jambyl oblysy jol polısııasy jeke batalonynyń vzvod komandıri etip taǵaıyndaǵan bolatyn.
Sol kúni túske taman qasynda tájirıbeden ótip júrgen Rýslandy tamaqtanýǵa jibergen. Kenet rasııadan ortalyq parkte atys bolǵanyn, qaza tapqandar bar ekenin estip, dereý oqıǵa ornyna kelip jetti. Qylmysty istiń baıybyna baryp úlgergen Baıtasov dál sol kezde sodyr baǵyt alǵan tustyń aldyn oraýǵa tyrysty. Qazybek bı men Abaı kósheleriniń qıylysynda qarýly qylmyskerdi baıqap qaldy. Qarsy aldynan tym jaqyn kelip qalǵan jol polısııasy qyzmetkerin kórgen qanisher oılanbastan avtomattan oq jaýdyrdy. Ǵazız mashınasynan túse sala, oǵan qarsy oq atyp, ony aıaǵynan jaralady. Qylmysker kóshede turǵan mashınalardyń artyna tyǵylyp, qasha jóneldi. Kóz jazyp qalmaýǵa tyrysyp edi, kenet kózi qaraýytyp ketti. Arqasyna bireý bir nárse tyǵyp alǵandaı bolyp, kúıdirip barady. Burylyp qarasa, qylmysker qarý kezenip tý syrtynda tur. Bir qolynda granata. Odan ári oılanatyn ýaqyt ta bolmady. Arystansha atylyp baryp, bas saldy. Qanisherdi astyna basyp alyp, qolyn qaıyrýǵa tyrysqan... Amal qansha... О́zin-ózi jaryp jibergen lańkes, er jigitti mert qyldy.
Halyq qaharmany Ǵ.Baıtasovtyń erligin ulyqtaý maqsatynda elimizdiń túkpir-túkpirinde jyl saıyn eske alý kúnine arnalǵan saltanatty is-shara ótip keledi. Bıyl da bul dástúr jalǵasyn tapty.
Jambyl oblysy Polısııa departamenti 12 qarashada Halyq qaharmany Ǵ.Baıtasovty eske aldy. Is-sharaǵa Jambyl oblysy Polısııa departamentiniń basshylyǵy, Ǵ.Baıtasovtyń týystary, Jambyl oblysy memlekettik organdarynyń ókilderi, ishki ister organdarynyń ardagerleri qatysty.
Saltanatty mıtıng Halyq qaharmany Ǵazız Baıtasovtyń eskertkishine gúl shoqtaryn qoıýmen bastaldy. Saltanatty gúl shoqtaryn qoıý rásiminen keıin, batyrdy bir mınýt únsizdikpen eske alyp, úsh dúrkin saltanatty salıýt atyldy.
«Halyq qaharmany, ishki ister organdarynyń úzdik qyzmetkerleriniń biri – IID jol polısııasy jeke batalony 1-vzvodynyń komandıri, polısııa kapıtany Ǵazız Baıtasovtyń qaza bolǵanyna bıyl 9 jyl toldy. Az ǵana ǵumyrynda asqan erligimen Otanǵa, týǵan jerge degen súıispenshiliktiń bıik ólshemin kórsetken qaharman áriptesimizdiń erligi óskeleń urpaqqa úlgi ekeni daýsyz. Tek naǵyz patrıot óziniń ómiri týraly oılamaı, erlikke bara alady. Jadymyzda máńgi saqtalatyn óziniń patrıot uldaryn Otanymyz eshqashan umytpaıdy», dedi Jambyl oblysynyń Polısııa departamenti bastyǵy Janat Súleımenov.
Ǵ.Baıtasovtyń jubaıy Gúljan Tájıeva óz sózinde Jambyl oblysynyń PD basshylyǵy men jeke quramyna otbasyna jasaǵan qamqorlyǵy úshin alǵysyn bildirdi. Is-shara barysynda Oblystyq tarıhı-ólketaný mýzeıinde halyq qaharmany Ǵ.Baıtasovqa arnalǵan stend ashyldy.
Sondaı-aq aqtóbelik tártip saqshylary da batyr polıseıdi eske aldy. Ǵazız Baıtasov – «Halyq Qaharmany» ataǵyna ıe bolǵan Qazaqstandaǵy alǵashqy polıseı. «Kapıtan Baıtasov – árbir polısııa qyzmetkeri men qarapaıym azamattar úshin erlik pen abyroı úlgisi», dep esepteıdi aqtóbelik tártip saqshylary.
Zulymdyqqa keýdesin tósep, janyn pıda etken Ǵazızdeı erler bolmasa, qoǵam qaıter edi?! Negizi batyrlyqty baǵalaý arqyly bozdaqtardyń esimin ardaqtap, eldigimizdiń kóshin túzeıtin urpaqqa úlgi etemiz. Olar máńgilik saparǵa attansa da, halqyna qyzmet ete beredi. Kapıtan Baıtasov — solardyń biri.
