Polısııa qyzmetkerleri, eriktiler jáne ákimdik ókilderi mekemelerdiń sanıtarlyq normalarǵa sáıkestigin tekseredi. Tekserýshiler atap ótkendeı, jıi kezdesetin buzýshylyqtardyń biri – jumys kestesi men áleýmettik qashyqtyqtyń saqtalmaýy.
Sonymen, 14 qarasha kúni saǵat 01:39-da "Adajio" resto-bary óz jumysyn jalǵastyrdy. Onda shamamen 30 kelýshi bolǵan. 13 qarashada 22:00-den keıin "5enj" meıramhanasy men "PeiZdes" laýndj-barynda ondaǵan kelýshi bolǵany anyqtaldy.
Sonymen qatar karantın rejimin birneshe ret buzǵany úshin "Alanııa" túngi klýbynyń ákimshisi eki táýlikke qamaýǵa alyndy. Onda kelýshiler sanıtarlyq dáriger buıryǵyn elemeı, túngi ýaqytta demalys ótkizgen.
"Biz mekemelerdiń sanıtarlyq-epıdemıologııalyq talaptarǵa sáıkestigin únemi tekserip otyramyz. Quqyq buzýshylyq faktileri anyqtalǵan jaǵdaıda ákimshilik sharalar qoldanylady. Búgingi tańda Esil aýdanynda 1330 obektige monıtorıng júrgizilip, onyń 204-ine aıyppul salyndy. Kóbi jumys kestesin buzady. Qaýlyǵa sáıkes, qoǵamdyq tamaqtaný pýnktteri túngi saǵat 22:00-ge deıin jumys isteýi kerek, biraq kóptegen mekemelerde jumys keshki 10-nan keıin jalǵasýda", dedi Esil aýdany sanıtarlyq-epıdemııalyq qadaǵalaý basqarmasy basshysy Aıman Janataeva.
Quqyq buzýshylarǵa qatysty jınalǵan materıal jaýapkershilikke tartý úshin taýarlar men qyzmetter sapasy men qaýipsizdigin baqylaý basqarmasyna jiberildi.
Buryn habarlanǵandaı, 11 qarashadaǵy jaǵdaı boıynsha Nur-Sultan qalasy taýarlar men qyzmetter sapasy men qaýipsizdigin baqylaý komıtetiniń aýdandyq basqarmalaryna karantındi buzǵan adamdarǵa qatysty aýdandyq polısııa basqarmalarynan 1981 materıal kelip túsken. Jalpy somasy 184 370 856 teńgege 905 jeke, laýazymdy jáne zańdy tulǵalar ákimshilik jaýapkershilikke tartyldy.
Búgingi tańda jalpy somasy 146 574 535 teńgege 717 ákimshilik aıyppul tólendi.
