Jyl basynda jarııalanǵan baıqaýdyń shartyna sáıkes elimizdiń túkpir-túkpirinen jıyrmaǵa jýyq sýret kelip túsken. Kartınalar jazýshynyń «Qudaısyzdar», «Jyndy jel», «Aǵaıyndar», «Juldyzdy belbeý», «It jyly», «Zaýal» syndy áńgimeleriniń jelisi boıynsha jazylǵan. Portretin beınelegen sýretshiler de boldy. Al baıqaýdyń jeńimpazdary jazýshy shyǵarmasyn beıneleý arqyly taqyrypty asha túsýine qaraı anyqtaldy. Álbette, oryndaý tehnıkasy, sheberligi de basshylyqqa alyndy. Baıqaýǵa usynylǵan jumystardy jazýshy, sýretshi Álibek Asqarov, «Qazaq eli» monýmentiniń avtory Sembiǵalı Smaǵul, belgili sharj sheberi Erkin Nurazhan, ózindik erekshe qoltańbalary bar sýretshiler Ádilǵalı Baıandın, Jeńis Kákenuly baǵalady.
– Qalamgerdiń shyǵarmashylyǵyna qatysty sýret kórmesi óte bermeıtin. Sońǵy ret qyrǵyz aǵaıyndar Shyńǵys Aıtmatovtyń 90 jyldyǵynda sýretshiler kórmesin ótkizgen edi. Endi mine, Dıdahmet Áshimhanulynyń áńgimeleriniń jelisi boıynsha birneshe polotno jazylypty. Bul jaqsy úrdis, dep atap ótti Qazaqstan Sýretshiler Odaǵynyń múshesi Erkin Nurazhan.
Al bas júlde – 500 myń teńgeni enshilegen jarmalyq sýretshi Mádı Qaıyrhan jazýshynyń shyǵarmalaryna kompozısııalyq kartına jáne «Qudaısyzdar» áńgimesiniń jelisine maıly boıaýmen ıllıýstrasııa jasaǵan.
«Qudaısyzdar» áńgimesinde taqyryby aıtyp turǵandaı, kommýnıstik partııa tusyndaǵy basshylardyń qudaısyz is-áreketteri sýrettelgen.
Jas sýretshi jazýshynyń áńgimesindegi «Arqalap ketken joq, jetektep ketti ǵoı, aǵa. Mundaǵy bárimizdiń qarap otyrǵanymyz – bir qyzyl sıyrdyń tórt emshegi edi, sony alyp ketti ǵoı apamyz...» degen joldaryn terezeniń arǵy jaǵynda kórsetip, fılosofııalyq oıdy jetkizgen. Bergi planǵa jupyny úıdiń terezesinen telmirip qarap turǵan qara uldy beınelegen. Otaǵasy tereń ýaıymǵa batqandaı. Áıeli qundaqtaǵy balasyna meıirimin tógip otyr. Qabyrǵada Stalınniń portreti ilingen. Qyzyl jaǵalylar esikti shalqasynan ashyp, tóbelerinen tónip tur. Mine, bas júlde ıegeri Mádı Qaıyrhan áńgimedegi negizgi oıdy toptastyryp, bir kartınaǵa syıǵyzǵan.
Sonymen qatar birinshi oryn alǵan sýretshige – 300 myń, ekinshi orynǵa – 200 myń, úshinshi orynǵa 100 myń teńge úlestirildi. Odan bólek yntalandyrý syılyqtary da usynyldy. Jazýshynyń uly Dáýlet Áshimhanovtyń uıymdastyrýymen ótken baıqaýǵa demeýshilik etken kásipker Ǵanı Shaımardanuly edi.
Esterińizge sala ketsek, jazýshy, jýrnalıst Dıdahmet Áshimhanuly eńbek jolyn Shyǵys Qazaqstan oblysynyń «Kommýnızm týy», «Lenınshil jas» gazetterinde tilshi bolyp bastap, ómirin jazýshylyqqa, jýrnalıstıkaǵa arnady. Ǵumyrynyń sońyna deıin ulttyń joǵyn joqtap, qalyń oqyrmanynyń ystyq yqylasyna bólenip ótti.
Shyǵys Qazaqstan oblysy
