2020 jylǵy 18 qarasha kúni Jánibek aýylynyń soltústik-batys jaǵyndaǵy kól betinde aqqýlar qatyp qalǵany týraly habar tarady. Jánibek aýyldyq okrýgi ákiminiń orynbasary Lázzat Aıtqalıqyzy jergilikti qutqarýshylarǵa habarlasyp, jabaıy qustardy qutqarýdy suraǵan.
Jergilikti turǵyndardyń sózine qaraǵanda aqqýlar sý aıdynynyń áli qata qoımaǵan kishkene bóliginde toptalyp júzip júrgen. Biraq tańǵy aıazda kól beti túgel qatyp, qustardyń baýyry muzǵa jabysyp qalǵan. Aýyl turǵyndary Ázıhan Zınekeshev pen Anatolıı Dýıýnov aqqýlardy qutqarmaq bolyp, muzdy oıyp, bosatqan eken. Biraq qustar jyly jaqqa ushýǵa áreket jasamaǵan. Al sý betinde osylaı taǵy bir kún qalsa, baıǵus qustardyń ajal tabatyny anyq edi.
Oqıǵa ornyna Batys Qazaqstan oblystyq Tótenshe jaǵdaılar departamenti "О́rt sóndirý jáne apattan qutqarý jumystary qyzmetine" qarasty №21 órt sóndirý beketiniń qutqarýshylary keldi. Jaǵdaıdy baǵamdaǵan soń olar arnaıy quraldarmen jabaıy qustardy ustap, sýdan alyp shyqty. Halyq qutqarýshylar Turarbek О́tenǵalıev pen Nurmuhan Ǵabdenovtiń eptiligine rıza boldy.
"Qazirgi ýaqytta qustar Jánibek aýyly turǵynynyń jyly qorasyna jetkizilip, ornalastyryldy. Olardy kóktemge, kún jylyǵanǵa deıin ustaı turatyn oryn máselesin oılastyryp jatyrmyz", dep habarlady Batys Qazaqstan Tótenshe jaǵdaılar departamentiniń baspasóz qyzmeti.
