Мектеп жаңарды

Аймақтар • 24 Қараша, 2020

Мектеп жаңарды

4 рет көрсетілді

Алғабас ауылы Орал – Атырау тас жолынан 30 шақырым қашықта жатыр. Талай жылдан бері ауа райының қолайсыз кезінде жол азабын жиі тартатын алғабастықтар биыл сол бейнеттің азаятынына қуанып жүр. Өйткені жол салынып жатыр.

Қазбек ҚҰТТЫМҰРАТҰЛЫ

Батыс Қазақстан облысында былтыр 368 шақырым жол жөнделсе, биыл мемлекет қазынасынан өңірдің 436,5 шақырым жолын жаңғыртуға 36,2 млрд теңге қаражат қарастырылған болатын. Осынау жақсы жаңалықтың игілігі Алғабас ауылын да шарпыды. Алғабастың жолын жаңғыртуға 2 234,61 млн теңге қарастырылса, соның 964,3 млн теңгесі биыл игерілуі керек. Мердігер «Жайыққұрылыс» ЖШС жалпы ұзындығы 36,12 шақырым жолды екі жыл ішінде салып бітірмек. Биыл межеленген 16 км жолдың 12 шақырымы дайын болған. Құрылысқа 33 техника, 70 жолшы жұмылған. Өткен тамыз айында басталған жол құрылысы 2021 жылдың маусым айына дейін аяқталуы тиіс. Жолдың сапасын тиісті мекемелерден бөлек өңір басшыларының өздері де мұқият қадағалап отыр.

Алғабас ауылындағы тағы бір қуаныш – 1984 жылы салынғаннан бері күрделі жөндеу көрмеген ауыл мектебінің жаңғыртылуы еді. Карантин себебінен қажетті құрылыс материалдары уақытында жеткізілмей, күрделі жөндеу мерзімі бір айға ұзарса да ауыл тұрғындарының көңілі көтеріңкі. Мектепті жаңғыртуға республика бюджетінен 678 305 миллион теңге бөлінген. 624 оқушыға арналған мектеп ғимаратының жанында 80 орындық интернаты да бар. Биылғы оқу жылында 292 оқушы тіркелген болса, соның 81-і кезекші сыныптарда мектепке барып білім алып жүр екен. Барлық құрал-жабдығы жаңартылған сыңғырлаған мектеп ғимараты оқушылардың сабақ үлгерімін көтеруге де әсер етері сөзсіз.

Күннің маңызды және өзекті жаңалықтарын «Егемен Қазақстан» телеграм каналынан оқыңыз