Aımaqtar • 24 Qarasha, 2020

Jambyl oblysynda jedel medısınalyq járdem kólikteri jańartyldy

11 ret kórsetildi

Búginde Jambyl oblystyq kópbeıindi balalar aýrýhanasynyń bazasynda ornalasqan Elbasy Nursultan Nazarbaev qorynyń «Qamqorlyq» ońaltý ortalyǵynda erekshe qajettiligi bar balalarǵa barynsha qoldaý kórsetilýde. Premer-Mınıstrdiń orynbasary Eraly Toǵjanov Taraz qalasyna kelip, atalǵan ortalyqqa atbasyn burdy, dep habarlaıdy Egemen.kz.

Ǵımaratty aralap kórip, mundaǵy atqarylyp jatqan jumystarmen de tanysty. Sonymen qatar, Eraly Toǵjanov oblystyq jedel medısınalyq járdem stansasynyń bas dárigeri Venera Balqybekovaǵa jedel járdem kólikteriniń kiltin tabys etti. Jalpy, osy ýaqytqa deıin oblysta 65 jedel járdem kóliginiń tozyǵy jetkeni sebepti olardy aýystyrý kerektigi aıtylyp kelgen bolatyn. Iаǵnı, óńirdegi jedel járdem kólikteriniń 48,8 paıyzy jańartýdy qajet etetin. Endi sol olqylyqtyń orny tolyp, 18 Hyundai markaly reanomobıl, 3 ÝAZ jáne JAC

mashınalary paıdalanýǵa berildi. Berilgen kólikterdiń bári de talapqa saı zamanaýı qural-jabdyqtarmen jabdyqtalǵan.

«Jambyl oblysyndaǵy jumys saparymdy Qordaı aýdanynan bastadym. Prezıdent Qasym-Jomart Toqaevtyń tapsyrmasyna sáıkes, beıbitshilik jáne kelisim jobasy aıasyndaǵy kún tártibinde turǵan máseleler onda júz paıyz deńgeıde oryndalǵanyn kórdim. Sol jerdegi jergilikti jáne árbir etnos ókilderiniń azamattarymen kezdesip, pikirlestim. Koronavırýstyń áserinen medısına salasynda kóptegen qıyndyqtar týyndaǵanyn bilesizder. Ol kezeńdi birliktiń arqasynda búkil el bolyp birge eńserdik. Ondaı qıyndyqtar endi bolmasyn dep tileıik. Mine, búgin óńirdiń densaýlyq salasyn ilgeriletetindeı materıaldyq-tehnıkalyq bazasy jaraqtandyrylyp otyr. Álemdi jaılaǵan osy indettiń aldyn-alý sharalaryna baılanysty naqty tapsyrmalar da berildi. Sonyń birazy júzege asyrylǵan. Dári-dármektiń eki aılyq qory tolyqtaı qamtamasyz etilgen. Sonymen qatar, árbir oblysta arnaıy turaqtylyq qorlary qurylǵan bolatyn. Jambyl oblysy da bul isti standartqa saı oryndap otyr», dedi vıse-premer.

Sonymen qatar, jedel járdem kólikterin júz paıyz jańalaýǵa múmkindiktiń bar ekenin aıtyp, qıyn-qystaý kezeńde atqarǵan jumystary úshin dárigerlerge alǵysyn bildirdi. Al, oblys ákimi Berdibek Saparbaev memleket tarapynan kórsetilip jatqan bul kómektiń el ıgiligi úshin ekenin aıtyp, Prezıdent pen Úkimetke alǵysyn jetkizdi.

Sońǵy jańalyqtar

Elimizde taǵy 1050 adam indetten aıyqty

Koronavırýs • Búgin, 09:44

Uqsas jańalyqtar