Medısına salasyna tyń serpin beredi

Qordaı aýdany Gvardeıskıı aýylynda ornalasqan atalǵan zaýyt Prezıdent tapsyrmasyna sáıkes salynýda. Bul joba turǵyndardyń ómirin qaýipti indetten qorǵaý maq­satynda qolǵa alynyp otyr. Zaýyt­tyń qurylys-montajdaý jumysta­ry osy jyly aıaqtalady. Qazirgi ýaqytta nysanǵa barlyq ınjenerlik kommýnıkasııalar jelisi júrgizilgen. Bul jerde jumysqa 145 adam kúshi men 30 birlik tehnıka tartylǵan. Zaýyt óz jumysyn kelesi jyldyń birinshi toqsanynda bas­taıdy dep josparlanýda. Munda álemdik standarttarǵa sáıkes ım­mý­no­bıologııalyq preparattar, onyń ishinde koronavırýs indetine, tumaýǵa, týberkýlezge, brýsel­lezge, nodýlıarlyq dermatıtke jáne bas­qa da ınfeksııalyq aýrýlarǵa qarsy vak­sınalar shyǵarylady. Jyl saıyn bıo­preparattardyń 30-60 mln dozasyn óndirý josparlanǵan.

Qazirgideı kúrdeli kezeńde memle­kettiń qoldaýy medısına salasyna tyń serpin berýde. Nátıjesinde, óńirde qaýipti indetpen kúres kúsheıgen. Indettiń qaıtalanýy yq­tımal ekinshi kezeńine de daıyndyq bastalyp ketti. Kezinde perınataldyq ortalyq bolǵan ǵımarat kúrdeli jóndeýden ótip, búginde Taraz qalalyq kóp­beıindi aýrýhanasy bolyp qaıta jab­dyqtalǵan. Atalǵan mekemege 200 medısınalyq kóp­fýnksıonaldy tósek, kompıýterlik tomo­graf, 20 ókpeni jasandy jeldetý ap­paraty, 2 defıbrıllıator, qandaǵy gaz­dar men elektrolıtterdi anyq­taıtyn avtomat­tandyrylǵan analızator, ottegi stansasy jáne 30 reanımasııalyq tósek satyp alynǵan.

Oblystyq densaýlyq saqtaý bas­qar­ma­synyń basshysy Áset Qa­lıevtiń aıtýynsha, óńirde ınfek­sııalyq stansıonardan búginde 4 149 adam saýyǵyp shyqqan. Alaıda osy ýaqytqa deıin táýligine 10 adam qaýipti indetti juqtyrǵan bolsa, ázirge sol kórsetkish qaıtalanýda. Koronavırýspen kúreste jer­gilikti bıýdjetten qomaqty qara­jat qarastyrylǵan. Máselen, medı­sınalyq maqsattaǵy qural-jab­dyqtar­dy satyp alýǵa 1,6 mlrd teńge bólingen. Ol qa­rajatqa 2 ekstrokorparaldy membran­dy oksı­genasııa apparaty, 100 kópfýnk­sıo­naldy kereýet, 14 ókpeni jasandy jeldetý apparaty, 4 sıfrly rentgen ap­paraty, 4 ottegi stansasy jáne taǵy da bas­qa medı­sınalyq jabdyqtar alynýda. So­nymen qatar respýblıkalyq bıýdjetten Jam­byl oblysynyń jedel járdem stansasyna 66 medısınalyq kólik lızıng boıynsha berilgen. Osy ýaqytqa deıin óńirdegi jedel járdem kólikteriniń tozyǵy jetkeni týraly túrli deńgeıde másele kóterilgen bolatyn. En­di sol olqylyqtyń orny tolyp, jedel jár­dem kólikteri de jańartyldy.

Sondaı-aq búginde 53 ók­peni jasandy jeldetý apparaty, 8 jyljyma­ly me­dı­sınalyq keshen alynǵan. Bas­qar­ma bas­shysy qazirgi kezde óńirdegi 78 medı­sı­na­lyq uıymǵa 6 mlrd teńge kóleminde dári­lik zattar men medısınalyq buıymdar jet­kizilgenin aıtty. «Al medısınalyq uıym­dar boıynsha aıtar bolsaq, olardyń 34-i basqarmaǵa qaraıdy. Sonymen qatar 35 uıym – jekemenshik, qalǵan 9 uıym – áskerı-medısınalyq uıymdar. Atalǵan ­
6 mlrd teńgeniń 1,1 mlrd teńgesi korona­vı­rýs indetimen aýyrǵandardy emdeý jáne aldyn alý úshin dárilik zattar men medı­sı­nalyq buıymdar alýǵa arnalǵan», deıdi Á.Qalıev.

Al qazir medısınalyq buıym­dar­dy iri jetkizýshilerdiń biri sanalatyn «Super-pharm» jaýapkershiligi shekteýli serik­testiginiń zaýyty da qaýipti indetpen kú­reske óz úlesin qosýda. Atalǵan nysan eli­mizdiń Údemeli ındýstrııalyq-ınnova­sııa­lyq damytý baǵdarlamasy aıasynda 2011 jyly paıdalanýǵa berilgen. Oblys ortalyǵynyń irgesindegi Jambyl aýdanynda ornalasqan kásiporynnyń ón­diristik qýaty jylyna shamamen 200 mln medısınalyq maqsattaǵy buıym shy­ǵa­rýǵa jetedi. О́ndiris ornynda 480 adam ju­­mys isteıdi. Endi jyl sońyna deıin ju­mys­­shylar sanyn 600-ge deıin arttyrý jos­­parlanýda. Kásiporyn bir rettik mas­­kalar, bir rettik tósektik oryn japqysh-jıyn­­tyqtaryn, bahılalar, kombınezon­dar men bas kıimder, operasııalyq halat­tar sekildi barlyǵy 300-ge jýyq buıym tú­rin shyǵarady.

Jambyl oblysy