Eń qysqa áńgime • 01 Jeltoqsan, 2020

Elbasy, Lýıza jáne balmuzdaq

83 ret kórsetildi

Elbasymen kezdesý talaı adamnyń (úlkenniń de, kishiniń de) ómirinde aıryqsha eleýli iz qaldyrǵany anyq. Sondaı bir jaı toqsanynshy jyldardyń basynda merkilik Lýıza Ersinqyzy Mirálıevanyń da basynan ótken edi.

Instagram paraqshasynan alyndy

«Bar-joǵy jeti jastamyn. Aýdan turǵyndarynyń Mem­leket basshysymen kezekti bir kezdesýine ákeme erip bardym. Ol kisi qazirgi Andas batyr aýy­lyndaǵy aýdandyq elektr júıesine qarasty bólimsheni bas­qaratyn edi. Alǵashynda «Bala-shaǵa baratyn jınalys emes» dep meni onda aparǵysy kelmegen. «Nur-atany jaqynnan kórgim keledi» degen ótinishime qulaq asty, aqyry», – dep sol kezdesýdi kúlimsireı esine aldy ol.

Kishkene qyz jıynda aıtyl­ǵan jaılardyń birin túsindi, birin túsinbedi. Ne de bolsa Nursultan atasyn jaqynnan kórgenine máz. Jıyn bitkennen keıin de jurt­tyń Elbasyn ortaǵa alyp, qur­met kórsetýi jalǵasqan. Sol tus­ta úlken kisi kópshiliktiń ortasyn­da árkimge bir qarap, jaýtańdaý­men turǵan muny kórip qalyp, qasyna shaqyryp: «Atyń kim?» – dep suraıdy. «Lýıza». «Neshinshi synypta oqısyń?». «Birinshi». Elbasynyń ózimen ashyq sóılesýi, meıirimdi júzi, jyly kózqarasy baýrady ma, qarshadaı qyz endigi bir sátte tosyrqaýyn qoıyp: «Ata, biz sizdi jaqsy kóremiz. Siz­ge densaýlyq tileımiz. Siz jaqsy adamsyz», – dep kóńilindegi izgi tilegin de jetkizedi. Bárinen de qyzyǵy – kishkene qyzdyń qyzdy-qyzdymen «Qashan bizdiń aýylda balmuzdaq bolady? Meniń kóp-kóp «morojenoe» jegim keledi» dep máseleni qabyrǵasynan qoı­ǵany boldy. Jurt dý kúlisip, onyń batyldyǵyna rıza bolyp, shapalaq uryp ta jiberdi.

Elbasyna da Lýızanyń alǵaý­syz kóńilmen aıtqan sózi unaı túsken sekildi. Jaıdarylana kú­lip, ony qolyna alyp kóterip, mań­daıynan súıip: «Bári de bolady, qyzym. Tek sabaǵyńdy jaqsy oqy. Jaraı ma? Baqytty bol!» – dep batasyn bergen edi. Lýıza da Nur-atasyna sabaǵyn tek jaqsy baǵaǵa oqýǵa ýáde etti. Kóp ótpeı onyń ótinishi de oryndalǵan. Sol jaz­da qyrǵyz elimen shekaralas shal­ǵaı aýylǵa aýdan ortalyǵy­nan avtodúkender kún qurǵatpaı qa­tynap, balmuzdaq degenińdi úıip-tógip ákelip, sa­tý­men bolyp­ty. Ásirese, kishken­taılar bir jyrǵaǵan. Olar mu­nyń óz qurdastary Lýızanyń «qoǵamdyq belsendiliginiń» je­misi ekenin de bilmedi.

Eń bastysy, sol kúngi kezdesýden bastap Lýızanyń kóńilinde ilki ózgerister oryn alady. El­ba­synyń sol joly aıtqan sózi ózin udaıy bıikterge talpyn­dyryp, áli kúnge jolyn nur­lan­dyrýmen kele jatqandaı se­zinetini bar. Qalaıda aıtqan ýádesiniń údesinen shyǵýǵa kúsh saldy. Pobeda aýylyndaǵy №21 orta mektepti «Altyn belgige», Taraz memlekettik ýnıversıtetin «Qarjy jáne nesıe» mamandyǵy boıynsha úzdik dıplomǵa bitiredi. Osy oqý ornynan ekinshi joǵary bilim – «Halyqaralyq quqyq bakalavry» mamandyǵyn da qosa meńgerip shyqqan.

Ol alǵashqy eńbek jolyn «Qaz­kommersbank» AQ Taraz bólim­shesinde esepshi-operasııashy bolý­dan bastap, Shymkenttegi «Alyance Retail Group» JShS-niń nesıeleý menedjeri, bólim basshysy, «Ońtústik» áleýmettik kásipkerlik korporasııasy ulttyq kompanııasy AQ-nyń menedjeri, seriktes kompanııalardaǵy bıznes úderisterin ákimshiliktendirý basqarmasynyń basshysy, «Asyl Arman» korporasııasy» JShS-nyń qarjylyq dırektory sekildi qyzmet baspaldaqtarynan ótipti. Búginde «Sberbank Rossıı» AQ Shymkent fılıalynyń kredıttik menedjeri eken.

Otbasynda Dılnaz, Dı­nara, Aqnazar, Sanjar esimdi per­zent­teri jelkildep ósip keledi. Bir kezdegi Elbasy bata-tileginiń qa­byl bolyp, ómirde órken jaıyp, qyzmette ósýine sharapaty tı­geniniń bir kórinisi osyndaı.

Qazir elimizdiń barlyq óńi­rinde de jaǵdaı jaqsy ǵoı. Ási­rese, balalar ne ishem, ne kıem de­meıdi. Lýızanyń keıde osy kish­kentaılaryna Shymqalanyń shi­lińgir shildesinde shól bassyn dep tátti balmuzdaqtar alyp berip, al­darqatatyny bar. Sol tusta baǵ­zy bir kezdegi «balmuzdaq oqı­ǵasy» esine túsip, Elbasyna degen rızashylyq sezimi kókiregin ker­nep-aq ketedi.

       

Baımahanbet AHMET,

jýrnalıst

 

Taraz

 

Sońǵy jańalyqtar

Álemdegi eń úlken muzdyq erip ketti

Ekologııa • Búgin, 11:05

15169 adam koronavırýs juqtyrdy

Koronavırýs • Keshe

Uqsas jańalyqtar