Shymkent qalasynyń ákimi Murat Áıtenov jańa avtobýstardy kórý úshin "T-bus" avtoparkine arnaıy bardy.
Yutong avtobýstary Qostanaıdaǵy "SaryarqaAvtoProm" zaýytynda qurastyryldy. Kólik shyǵaratyn otandyq kásiporyn 2010 jyly Elbasy QR Tuńǵysh Prezıdenti N.Nazarbaevtyń tikeleı bastamasymen ashylǵan bolatyn. Qalaǵa ákelingen avtobýstar joǵary sapa standartyna sáıkestendirilgen. Basty artyqshylyǵy –avtobýstardyń tabıǵı gazben jumys isteýinde. Sondaı-aq barlyq avtobýstar beınekamera, jeldetkish, habarlama jarııalaýǵa arnalǵan mıkrofondarmen jabdyqtalǵan. Pandýs pen múgedekterdiń arbalaryn ornalastyratyn oryndar da qarastyrylǵan.
Búginnen bastap júz elý avtobýs №103, 27, 35, 84, 135, 92, 74, 12 marshrýttarynda qyzmet kórsetedi.
Odan ózge, Badam ózeniniń ústinen ótetin kópir turǵyndar ıgiligine berildi. A-2 "Horgos-Almaty-Shymkent-О́zbekstan Respýblıkasynyń shekarasy" avtokólik jolyn qaıta qurý jumystary tolyǵymen aıaqtaldy. Qala ákimi Murat Áıtenov qurylysy aıaqtalǵan kópirdiń ashylý rásimine qatysty.
Qoldanystaǵy kópir 1970 jyldary salynǵan. Uzyndyǵy 144 metr, eni 11 metrdi quraıtyn. 2005 jyly kópirdiń tehnıkalyq jaǵdaıy apatty dep tanyldy. 2016 jyly atalǵan respýblıkalyq mańyzy bar avtomobıl joly Shymkent qalasynyń teńgerimine qabyldanyp, 31,6 shaqyrym joldy qaıta qurý jumystaryna jobalyq-smetalyq jumystar (7 kezeń) ázirlene bastaldy. 1 kezeń boıynsha kópir qurylysy úsh kezeń boıynsha júrgizilip, 1 148 shaqyrym jol jóndeldi. Qaıta qurý jumystarynyń esebinen, apatty kópirdiń ornyna jańa kópir salynyp, eni 22 metrge ulǵaıdy. Nátıjesinde kópirdiń kólik ótkizý qabileti 2 esege artty.
Sonymen qatar, mereke qarsańynda jańa bilim ordasy ashyldy. "Shym sıtı" shaǵynaýdanynda ornalasqan №135 jalpy orta bilim beretin mektep 1200 orynǵa arnalǵan.
Shymkent qalasynyń ákimi Murat Áıtenov jańadan salynǵan bilim nysanymen tanysyp, ǵımaratty aralap kórgen bolatyn.
Mektepte lıngafondy kabınet, arnaıy bastaýysh synyp kabıneti, er balalarǵa arnalǵan tehnologııa kabıneti jáne sport zal bar. 720 oqýshy bilim alýda.
Aıta ketý kerek, Shymkentte jyl sońyna deıin birqatar bilim oshaǵynyń qurylysy aıaqtalyp, úsh aýysymdy mektepter sany azaıatyn bolady.
