Ekonomıka • 03 Jeltoqsan, 2020

Investısııalyq tabys – 1,1 trln teńge

14 ret kórsetildi

Biryńǵaı jınaqtaýshy zeınetaqy qoryndaǵy jınaqtardyń jalpy somasy 12,6 trln teńgeden asty. Onyń 1,1 trln teńgesi – ınvestısııalyq tabys.

Qazaqstanda zeınetaqy aktıvterin Ulttyq bank senimgerlik basqarýǵa alǵany belgili. Sondyqtan qarjylyq retteýshi qordaǵy somany túrli qarjy quraly retinde ınvestısııalaı alady. Táýekelderdi azaıtý maqsatynda qor qarjysy ınvestısııalyq tabys tabý úshin ártúrli valıýtamen jumsalady. Qazirgi ýaqytta ınvestısııalardyń úshten ekisi teńgemen, úshten biri shetel valıýtasymen kórsetilgen. Onyń ishinde kóp bóligi AQSh dollarymen nomınaldanǵan.

Biryńǵaı jınaqtaýshy zeı­net­aqy qorynyń habarlaýynsha, salymshylardyń jınaǵyndaǵy soma zeınetaqy aktıvterin ınvestısııalaý nátıjelerine sáıkes kún saıyn qaıta eseptelip, qaıta baǵalanady eken. Investısııalyq tabystyń quramyna baǵaly qaǵazdar syıaqysy, qarjy quraldaryn naryqtyq qaıta baǵalaý, valıýtalyq qaıta baǵalaý, syrtqy basqarýdaǵy aktıvterdiń kiristeri jáne taǵy basqalary kiredi.

Osy jyldyń on aıynda salymshy­lar­dyń shottaryna 1,1 trln teńge kóleminde taza ınvestısııalyq kiris eseptelgen. Bul 2019 jyldyń sáıkes kezeńindegi kórsetkishten eki ese artyq. Bir jyl burynǵy taza ınvestısııalyq kiris 551,1 mlrd teńgeni quraǵan bolatyn. Bul rette ótken jyldyń 1 qarashasynan osy jyldyń 1 qarashasyna deıingi aralyqtaǵy kiris 10,88 paıyzǵa teń boldy. Osy aralyqtaǵy ınflıasııa 7,1 paıyz bolǵanyn eske sala ketken jón. 2020 jyldyń basynan beri kiristilik 9,94 paıyzdy kórsetse, ınflıasııa 5,5 paıyzdy qurady.

Barlyq zeınetaqy aktıvteri BJZQ-ǵa biriktirilgen sátten bastap Ulttyq bank qamtamasyz etken ınvestısııalyq tabys shamamen 4,6 trln teńgege jetti. Al zeınetaqy jınaqtarynyń jalpy kólemindegi taza ınvestısııalyq tabystyń úlesi – 34,5 paıyz.

Qazaqstannyń jınaqtaýshy zeınet­aqy júıesi qurylǵan 1998 jyldan bergi taza ınvestısııalyq tabys 5,4 trln teńgeden asqan. Osy ýaqyt ishinde ınvestısııalyq kiristilik 596,69 paıyzǵa, al ınflıasııa 485,55 paıyz­ǵa teń boldy. Osylaısha 2020 jylǵy 1 qarashadaǵy jaǵdaı boıynsha zeınetaqy aktıvteriniń jalpy naqty tabystylyǵy 111,14 paıyzdy qurady.

 

Sońǵy jańalyqtar

Qazaqstanda urlyq sany eki esege azaıdy

Qazaqstan • Búgin, 17:15

Kann festıvali jazǵa shegerildi

О́ner • Búgin, 16:42

Prezıdent Alık Shpekbaevty qabyldady

Prezıdent • Búgin, 16:02

Uqsas jańalyqtar