Osy oraıda, jaqynda Taraz qalasy ákimdigine qarasty «Medıa ortalyq» mekemesi ashyldy. Endi qala turǵyndary ár mekemeniń esigin bir qaqpaı, tikeleı kelip máselesin osy ortalyqqa aıtatyn bolady.
Atalǵan mekemeniń ashylý rásimine qala ákiminiń orynbasary Almas Sadýbaev qatysyp, bul ortalyqtyń qala ákimi Aıtqazy Qarabalaevtyń bastamasymen ashylyp otyrǵanyn jetkizdi. Sondaı-aq jańadan ashylǵan medıa ortalyq áleýmettik jelidegi resmı paraqshalarǵa qala turǵyndarynan kelip túsken suraqtarǵa jaýap berip, oblys ortalyǵy týraly medıa resýrstardaǵy aqparattardyń mazmunyn saraptap, respýblıkalyq buqaralyq aqparat quraldary men ınternet resýrstarda qala týraly shyqqan aqparattarǵa turaqty monıtorıng júrgizetinin atap ótti. Sonymen qatar ol ortalyqtyń basty maqsaty – turǵyndarmen keri baılanys ornatyp, kez kelgen suraqtaryna jaýap berip, olardyń kótergen máseleleriniń sheshilýine yqpal etý ekenin de jetkizdi.
Budan keıin Bolat Japparuly, Asqarbek Seıilhan, Ǵalym Qasabaı jáne Qýanysh Iemberdıev sııaqty óńirdegi ardager jýrnalıster de sóz alyp, bastamaǵa qoldaý bildirip, medıa ortalyqtyń jumysyna sáttilik tiledi. Al jańa ortalyqtyń lentasyn ardager jýrnalıst Amangeldi Nurpeıisov pen aqyn, Qazaqstan Jazýshylar odaǵynyń múshesi Ǵaını Álimbekqyzy qıdy. Saltanatty sharadan keıin kópshilik atalǵan ortalyqtyń ǵımaratymen tanysty. Búginde ortalyqtyń jóndeý jumystary tolyǵymen aıaqtalǵan. Munda turǵyndardy qabyldaıtyn, tikeleı efırge shyǵatyn jáne aqparat taratylatyn arnaıy bólmeler bar. Barlyq bólme qajetti quraldarmen jabdyqtalǵan. «Medıa ortalyqta» jýrnalıster, SMM jáne beınequrastyrýshy mamandardan quralǵan 13 qyzmetker jumys isteıdi. Sonymen qatar jańa nysan aldaǵy ýaqytta eki myń jyldan astam tarıhy bar Taraz shaharynyń ımıdjin kóterý maqsatynda da rolıkter men ınfografıkalar jáne bannerler ázirleıtin bolady.
Jambyl oblysy
