О́ńirlik kommýnıkasııalar qyzmeti alańynda ótken onlaın-brıfıng barysynda Almaty qalasy qalalyq josparlaý jáne ýrbanıstıka Basqarmasynyń basshysy Almashan Ahmedjanov atap ótkendeı, Almaty qalasy Bas josparynyń jobasyn tikeleı bekitý 2021 jyldyń I toqsanyna josparlanǵan.
Esterińizge sala keteıik, buǵan deıin "Almaty qalasynyń erekshe mártebesi týraly" zańda qabyldanǵan ózgerister men tolyqtyrýlarǵa sáıkes, Almaty ákimdiginiń sáýlet jáne qala qurylysy salasyndaǵy qyzmetti úılestirýge múmkindik beretin quzyrettiligi keńeıdi. Osy Zańnyń engizilýimen qala men qala mańy aımaǵyn birlesip teńgerimdi damytý múmkindigi paıda boldy.
"Bas jospardy túzetýdiń negizgi maqsaty qalanyń turaqty damýyn qamtamasyz etý, qaýipsiz, qolaıly, jaıly qalalyq orta qurý bolyp tabylady, bul Almatyny "shetsiz qala" etedi", dedi ol.
"Almaty qalasynyń erekshe mártebesi týraly" zańǵa, sonymen birge, dızaın-kodty engizý boıynsha norma engizildi, ol óz kezeginde Almaty qalasy aýmaǵyndaǵy ǵımarattardyń qasbetteriniń, jarnama konstrýksııalarynyń arhıtektýralyq sheshimderine, jazǵy alańdarǵa, shaǵyn sáýlet nysandaryna qoıylatyn talaptardy, sondaı-aq olardy ornalastyrýdy júıelendirip, retke keltiredi.
"Almatyda dızaın-kodty engizý — Qazaqstan úshin pılottyq joba. Kóp eńbekti talap etetin bul jumys muqııat zertteýdi, shyǵarmashylyq kózqarasty jáne naqty belgilengen erejelerdi talap etedi. Birqatar tarmaqtar boıynsha qoǵamdyq tyńdaýlar ótkizildi. Alaıda, pandemııa túzetýler engizdi: qoǵamdyq tyńdaýlar biraz ýaqytqa toqtatyldy", dedi A. Ahmedjanov.
Sonymen qatar, ol bıylǵy jyly qalanyń kóptegen jazǵy alańdary jalpy talaptardy eskere otyryp resimdelgenin atap ótti. Jóndeýge nemese rekonstrýksııalaýǵa daıyndyq kezinde keıbir iri tamaqtaný oryndary ǵımarat pen oǵan irgeles aýmaqty jobalaý boıynsha usynystar alý úshin Basqarmaǵa júginýde.
"Biryńǵaı erejelerdi qurý boıynsha jumys jalǵasýda. Dızaın-kod jobasy qala turǵyndaryna talqylaý úshin usynylatyn bolady. Qujatty engizý boıynsha qoǵamdyq tyńdaýdy qaıta bastaý merzimi qala men eldegi epıdemııalyq jaǵdaıǵa baılanysty bolady", dep atap ótti A.Ahmedjanov.
