"Ulytaý Kókbórisi" dep atalǵan bul músinniń tuǵyrymen qosqandaǵy bıiktigi 9,70 metr. Al eskertkishtiń jeke turǵandaǵy boıy alty metrdi quraıdy eken. Músinniń tuǵyrymen qosa eseptegendegi salmaǵy bes tonna shamasynda. Ishki qurylymy temirden soǵylyp, syrty Arqanyń aqshunaq aıazy men aptap ystyǵyna tótep beretin plastık materıaldan quıylypty.
Músin ıdeıasynyń avtory jáne somdaýshysy Eýrazııa Dızaınerler odaǵynyń múshesi Amantaı Meńdiǵalıev eken. Músinshi osydan bir jyl buryn atalǵan eskertkishtiń eskızin jasap, Mádenıet jáne sport mınıstrliginen avtorlyq quqyq kýáligin alypty.
"Alaıda belgili sebepterge baılanysty ıdeıany júzege asyrýdyń oraıy kelmedi. Tek, Ulytaý aýdanynyń ákimi Berik Ábdiǵalıulynyń qoldaýy arqasynda ǵana másele sheshimin tapty. Eskertkishti jasap shyǵarýǵa ózimniń ulym, músinshi Armattyń kóp kómegi tıdi", – deıdi A.Meńdiǵalıev.
Avtordyń aıtýynsha, álemde qasqyrǵa ornatylǵan dál osyndaı ólshemdegi músin joq eken. Sondyqtan qazirgi ýaqytta Ulytaý aýdanynyń ákimdigi "Ulytaý Kókbórisi" eskertkishin Gınnestiń rekordtar kitabyna engizýge qatysty usynys qaǵaz-qujattaryn retteýdi qolǵa alypty.
