Ulttyq statıstıka bıýrosynyń derekterine súıensek, syrttan keletin týrıster sany 72,3 paıyzǵa, ıaǵnı, 1,8 mln adamǵa deıin azaıyp ketken. Qazaqstannan syrtqa ketkender 70,8 paıyzǵa az. Olardyń sany 2,4 mln adam. Ishki týrızm de edáýir quldyraýdy bastan keship otyr – 39,7 paıyzǵa qysqarý baıqalady.
Týrıster kelmegen soń, túrli týrıst qabyldaýshy oryndardyń da tabysy 49,8 paıyzǵa quldyrap ketken. Jyl basynan beri hostel men qonaqúıler jalpy quny 47,4 mlrd teńgege 2,5 mln adamǵa qyzmet kórsetipti. Aqshanyń basym bóligin (33,2 mlrd teńge) meıramhanasy bar qonaqúıler enshilegen. Balalar lageri nebári 223,1 mln teńge tabys tapqan.
О́ńirler arasynda Almaty kósh bastaıdy. Elimizdegi iri qarjy ortalyǵy 11,5 mlrd teńge, elorda 8 mlrd teńge tabys enshilegen. Qazaqstannyń jeti aımaǵynda kórsetilgen qyzmet quny 1 mlrd teńgeden de aspaıdy. Eń az tabys taýyp, kósh sońynda qalǵan aımaq – Soltústik Qazaqstan oblysy.
Bul rette statıstıka otelderdiń ortasha tolýy nebári 18 paıyzǵa áreń jetkenin aıtady. Táýliktik quny 7,6 myń teńgege deıin tómendegen. Máselen, eldegi eki juldyzdy qonaqúıler bir táýlik úshin orta eseppen 13,3 myń teńge suraǵan. Al kýrortty aımaqtardyń tabysy 24,5 mln teńgege baǵalanady. Olarǵa ishki 1,1 mln, syrtqy 97,4 myń adam barǵan.
Ulttyq ekonomıka mınıstrligi statıstıka komıtetiniń málimetinshe, 2020 jyldyń II toqsanynda Qazaqstanǵa 132,9 myń týrıst kelgen. Bul 2019 jyldyń II toqsanymen salystyrǵanda 16,5 ese az. Byltyr kelýshiler sany 2,2 mln adamnan asyp túsken edi.
II toqsanda qonaqúıler men ózge de ornalasý oryndarynda 418 myń nómir paıdalanýǵa berilgen. Bul sıfr da 2019 jyldyń dál sol kezeńimen salystyrǵanda 3,2 ese az ekenin ańǵartady.
