Búgingi tańda ǴZI otandyq QazCovid-in vaksınasyn klınıkalyq synaýdyń I jáne II fazalaryn júrgizdi. Zertteýdiń aldyn ala nátıjeleri vaksınanyń joǵary qaýipsizdigin, ımmýnogendiligin jáne tıimdiligin 96% deńgeıinde kórsetti.
Densaýlyq saqtaý mınıstrligi úsh myń eriktige klınıkalyq zertteýlerdiń qorytyndy III kezeńiniń bastalýyn maquldady. Búginde alǵashqy eriktiler Almaty jáne Taraz qalalarynyń klınıkalarynda, ǴZI-da otandyq vaksınamen egildi. 2020 jylǵy jeltoqsan aıynyń sońyna deıin úsh myń eriktini vaksınasııalaý aıaqtalady. III kezeńdi ótkizý úshin 10 myń doza kóleminde vaksınanyń qajetti partııasy shyǵarylady.
«Otandyq vaksınamen jappaı egý 2021 jyldyń naýryz aıynda bastalady. Birinshi kezekte erikti túrde medısına qyzmetkerlerine, pedagogterge, sondaı-aq sozylmaly aýrýlarmen aýyratyn toptaǵy adamdarǵa ekpe jasalady», dedi A.Mamın.
Premer-Mınıstr vaksına shyǵaratyn bıofarmasevtıka zaýytynyń qurylysymen tanysty. Qurylys jumystary kestege sáıkes júrgizilýde. Zaýytty 2021 jyly naýryz aıynda paıdalanýǵa berý josparlanyp otyr. О́ndiristiń qýaty jylyna 60 mln dozany quraıdy.
Úkimet basshysy ımmýnobıologııalyq dárilik preparattardyń, onyń ishinde koronavırýs ınfeksııasyna qarsy vaksınalardyń otandyq óndirisin qamtamasyz etý úshin QR BǴM Bıologııalyq qaýipsizdik problemalary ǴZI materıaldyq-tehnıkalyq bazasyn odan ári damytý men jańǵyrtýdyń mańyzdylyǵyn atap ótti.
Premer-Mınıstr ǴZI ǵylymı qyzmetkerlerine arnalǵan 180 páterlik úsh úıdiń qurylys alańyna bardy. 60 páterlik alǵashqy turǵyn úı 2021 jyly qańtar aıynda paıdalanýǵa beriledi.
