Mundaı zańsyzdyqtyń jolyn kesý úshin ókiletti organdar júrgizetin reıdtik sharalarǵa qoǵamda belsendi azamattar da aralasa bastaǵandyǵy qýantady.
Trassaǵa nuqsan kelmes úshin aýyr mashınaǵa tıelgen júktiń salmaǵy 8-16 tonnadan aspaýǵa tıis. Alaıda kóliktik baqylaý ınspektory jolda toqtatqan kólikterdiń deni 10 tonnaǵa deıin artyq júk alyp kele jatqan bolyp shyǵady. Zań buzǵan azamattarǵa ákimshilik hattama toltyrylyp, kóligi aıypturaǵyna qoıylady.
«Reıdtik tekserýlerge shyqqan sátte aýyr mashınalardyń 25 tonnaǵa deıin, ıaǵnı ruqsat etilgen shamadan 10 tonna artyq salmaqta júk alyp bara jatqanynyń kýágeri bolamyz. Ásirese, kún jylyda jol jumsarǵan kezde mynadaı kólikter qaptap júrse myna joldyń nesi qalady?! Sapasy qaıdan bolady?! Memlekettiń, bıýdjettiń qarajatyn tıimdi paıdalaný degen uǵymdy qazirgi qoǵamǵa mynadaı zańsyzdyqty tyımaı turyp qoldanýǵa áli erte sııaqty. Sondyqtan osy baǵytta monıtorıng jumystaryn jıi júrgizý qajet» - deıdi «Mańǵystaý - adaldyq alańy» jobalyq keńsesiniń jetekshisi Daırabaı Úsipbaev.
Jol sapasyn baqylaýshylar trassaǵa barǵan boıda tekserý júrgizýge múmkindik beretin jyljymaly zerthanamen qamtylǵan. Jyl basynan beri oblys boıynsha aýyr júk kólikteri jıi júretin trassalarǵa 340 ret baryp keldi. Ondaǵy jolǵa tóselgen materıaldardyń qazirgi jaı-kúıin anyqtaý úshin 1400-deı synama alyndy. Onyń 500-ge jýyǵynan aqaýlyq tabylyp otyr.
«Synamalardyń ishinde 462-si sapaǵa saı bolmady. Bas-aıaǵy 158 aqaýlyq anyqtalyp, jol qurylysynda júrgen merdiger mekemelerge jáne olardyń jumysyna tapsyrys bergen aýdandyq ákimdikterdiń bólimderine eskertilip, qyzmettik hat joldandy. Nátıjesinde 88 aqaýlyq qazirgi tańda tolyq jóndeldi. Qalǵandaryn qalpyna keltirý sharalary jalǵasyp jatqanyn qazirde kórip otyrmyz» - deıdi «Jol aktıvteriniń ulttyq sapa ortalyǵy» RMK Mańǵystaý fılıalynyń zerthana meńgerýshisi Sáken Muhtarov.
Osy jyldyń qańtar-qazan aralyǵynda kóliktik baqylaý ınspektorlarymen birlese júrgizilgen reıdtik is-sharalar kezinde 1207 júk kóligi toqtatylyp, salmaǵy tekserildi.
Zań buzýshylyqqa barǵan júk tasymaldaýshy tulǵalarǵa QR ákimshilik quqyq buzýshylyq Kodeksiniń 71-shi babynyń 1-shi tarmaǵy jáne 571-shi babynyń 6-shy tarmaǵyna sáıkes 33 mln 90 myń teńge kóleminde ákimshilik aıyppuldar salynyp otyr.
Mańǵystaý oblysy
