SQO tabıǵatty qorǵaý polıseıleri múddeli vedomstvolardyń qyzmetkerlerimen janýarlar dúnıesin brakonerlerden qorǵaý boıynsha turaqty birlesken reıdterdi ótkizedi.
5 jeltoqsanda kezekti reıd barysynda Mamlıýt aýdanynyń PB tabıǵatty qorǵaý polısııasy qyzmetkerleri Meńgeser ańshylyq sharýashylyǵy qoryqshysymen Katanaı s. mańyndaǵy jerde Petropavldyń 37 jastaǵy turǵyny basqarǵan “Nissan Hilux” avtokóligin toqtatqan. Onyń jolaýshylary taǵy bir qalalyq pen eki aýdan turǵyny bolǵan. Kólik salonynan qynapqa salynǵan tegis uńǵyly qarý, 42 patrony bar oqshantaı, pyshaq tabyldy. Júksalǵyshta bastary kesilgen, atys jaraqaty keltirilgen tórt sibir eligi jatqan. Atalǵan fakti QR Qylmystyq kodeksiniń 337-baby (Zańsyz ańshylyq) boıynsha Sotqa deıingi tergep-tekserýlerdiń biryńǵaı tizilimine engizildi.
– Qazirgi ýaqytta eki qarýdyń ıesi 54 jáne 48 jastaǵy aýyl turǵyny kúdikti dep tanyldy, – deıdi Mamlıýt aýdanynyń PB bastyǵy Serik Áljanov. – Olar ýaqytsha ustaý ızolıatoryna qamaldy. Janýarlardyń denesi, qarý men avtokólik tárkilendi, qajetti saraptamalar taǵaıyndalyp, tergeý júrgizilýde.
