Irgetasy berik qalanyp, búginine de, bolashaǵyna da ýaqtyly qam jasaǵan jas memleketimiz ishki-syrtqy saıasattaǵy sabaqtastyqty saqtaı bilgen Memleket basshysy Qasym-Jomart Toqaevtyń syn kezeńdegi syndarly is-qımylynyń arqasynda asa qaterli indetti aýyzdyqtap, ekonomıkadaǵy daǵdarysty eńserip, qıyn synaqtan abyroımen shyǵyp keledi. Qazir kóńilimizdegi kirbiń-kúdiktiń ornyn úmit basyp, táýelsiz elimiz barda, eli súıgen, elin súıgen azamattarymyz ben birligi myqty elimiz barda basqa túsken qıyndyqtyń bárin birlese jeńip shyǵatynymyzǵa esh shúbálanbaıtyn boldyq.
Bul rette Memleket basshysy Qasym-Jomart Toqaev Táýelsizdik kúni qarsańynda ótken memlekettik nagradalardy tapsyrý rásiminde sóılegen sózinde «Biz bul synaqqa tótep berip, elimizdi jahandyq daǵdarystan alyp shyǵý úshin bar kúsh-jigerimizdi jumyldyrdyq. Ekonomıkaǵa qatysty teris boljamdardy joqqa shyǵaryp, indettiń zardabyn azaıttyq. Der kezinde qabyldanǵan sharalardyń arqasynda ahýaldy birshama turaqtandyrdyq», dep atap ótti.
Sondaı-aq Prezıdent jahandyq dúrbeleńge qaramastan memleketimizdiń irgesi myǵym, tuǵyry bekem ekenin dáleldegenimizdi, halqymyz janashyrlyq pen qamqorlyqtyń, uıymshyldyq pen bereke-birliktiń ozyq úlgisin kórsetkenin jáne volonterler qozǵalysy jalpyulttyq sıpatqa ıe bolǵanyn basa aıtty. Dárigerler men muǵalimderdiń, tártip saqshylary men áskerı qyzmetshilerdiń kúndelikti ómirimizdegi róline erekshe mán berdi. Indetpen kúrestiń alǵy shebinde, bastaryn báıgege tigip júrgen jáne qurban bolǵan azamattardyń bir toby memlekettik nagradalarmen marapattalyp, olarǵa aıryqsha qurmet kórsetilgendigi óte oryndy. Osy oraıda Memleket basshysynyń tapsyrmasyna sáıkes kelesi jyldan bastap dárigerlerdiń jalaqysy ekonomıkadaǵy ortasha jalaqymen salystyrǵanda eki ese kóbeıtiletindigin de aıta ketken jón. Bul halqymyzdyń basty baılyǵy – densaýlyǵynyń kúzetinde janqııarlyqpen eńbektenip júrgen aq halatty abzal jandarǵa laıyqty qoldaý dep bilemiz. Sondaı-aq ustazdarǵa, polıseıler men áskerı qyzmetshilerge kórsetiletin memlekettik qamqorlyq aıasy da udaıy keńeıip keledi.
El Prezıdenti kelesi jyldy «Táýelsizdiktiń 30 jyldyǵy» dep jarııalady. Memleket basshysy ótken árbir on jyldyqtyń atqarǵan mıssııasy turǵysynan ǵasyrdyń júgin arqalap turǵanyn málimdedi.
Koronavırýs pandemııasynan tıisti sabaq alyp, toıshyldyq pen dańǵoılyq syndy teris ádet-ǵurpyn tyıyp, qatań tártipke baǵyna biletindigin aıǵaqtaǵan halqymyz, Prezıdentimiz aıtqandaı, uly Abaı ósıetin oryndap, bilimdi de bilikti, uqypty da jaýapty, isker de eńbekqor jurtqa aınalýy tıis. Ata-babamyz ańsaǵan, baǵa jetpes baqytymyz – Táýelsizdik aldyndaǵy basty paryzymyz da osy.
Káribaı MUSYRMAN,
Parlament Májilisiniń depýtaty
