Statıstıkalyq málimetterge qarasaq, álemde árbir 24 sekýnd saıyn bir adam jol apatynan qaza tabady eken. Osylaısha kúnine úsh myńnan astam adam, jyl saıyn 1,35 mıllıon adam jol-kólik oqıǵasynan kóz jumatyn kórinedi. Budan bólek 10 mıllıondaı adam jaraqat alyp, múgedek arbasyna tańylady.
– Bizdiń Batys Qazaqstan oblysynda 2020 jyldyń 10 aıynda 247 jol-kólik oqıǵasy oryn aldy. Osy apattardyń saldarynan 57 adam qaza taýyp, 298 adam ár túrli dene jaraqatyn aldy. Balalardyń qatysýymen 31 oqıǵa bolyp, onyń saldarynan 1 sábı qaıtys bolyp, 34 adam jaraqat aldy, – deıdi Batys Qazaqstan oblystyq Polısııa departamentiniń resmı ókili Bolatbek Belgibekov.
Birikken Ulttar Uıymy qarasha aıynyń úshinshi jeksenbisin Dúnıejúzilik jol-kólik oqıǵasynyń qurbandaryn eske alý kúni dep belgilegen bolatyn.
Birikken Ulttar Uıymynyń derekterine qaraǵanda, jol-kólik apatynda qaza tapqandardyń jartysynan astamy – jaıaý júrginshiler, motosıkl jáne velosıped júrgizýshileri eken. Mundaı oqıǵa bizdiń elimizde de az emes. Sondyqtan bılik oryndary, quqyq qorǵaý organdary joldardy josparlap salýdan bastap, jyldamdyqty arttyrmaý, kólik quralyn mas kúıde júrgizýge jol bermeý, qaýipsizdik beldigin taǵý, motosıkl júrgizýshilerine dýlyǵa kııý, balalarǵa arnalǵan oryndyq qoıý boıynsha birqatar shara qabyldap, turǵyndar arasynda únemi túsindirý jumystaryn júrgizip keledi.
2019 jyly 20 jeltoqsanda balalar men jasóspirimder zardap shegetin jol-kólik oqıǵalarynyń aldyn alý, osy ıgi iske jurtshylyqtyń nazaryn aýdartý maqsatynda Enı, Shell jáne EASST kompanııalarynyń ókili «Gaýhar joly» qozǵalysy Polısııa departamentine jolda júrý erejesin, ásirese balalardyń qaýipsizdigin qamtamasyz etý boıynsha sheberlik saǵatyn ótkizýge arnalǵan mobıldi alań men burysh jasaqtap bergen. Bul alańda jolda júrý erejesin qalaı saqtaý kerek ekenin kórsetetin oıyn túrinde keńistik bar. Onda kólik quralyna qoıylatyn naqty talaptar kórinip tur. Osy mobıldi alańda balalarǵa baǵdarshamnyń qaı túsi janǵanda jaıaý júrginshiler ótkelinen ótý, jol belgilerin bilý daǵdylaryn úıretedi jáne balalardy kóshede, jolda qaýipsizdik erejelerin saqtaýǵa daǵdylandyrady. Bul mektep oqýshylaryn jol erejelerine baýlýǵa óte paıdaly quraldar.
Bıyl da qarasha aıynda «Gaýhar joly» qoǵamdyq birlestigi Oral qalalyq Polısııa basqarmasy patrýldik polısııa batalonymen birlesip, Oral qalasyndaǵy «Atrıým» saýda úıiniń birinshi qabatynda aksııa ótkizdi.
Bolatbek Belgibekovtiń aıtýynsha, Terekti, Syrym jáne Qaratóbe aýdandaryndaǵy mektepterde de oqýshylarǵa jolda júrý erejesin túsindiretin taqyryptyq keshter uıymdastyrylǵan. Polısııa departamentiniń qyzmetkerleri mektepterge arnaıy baryp, oqýshylarǵa joǵaryda aıtylǵan mobıldik alańda praktıkalyq sabaqtar ótkizgen.
Kórneki quraldardy paıdalanyp, polısııa qyzmetkerlerin qatystyryp ótkizgen mundaı sharalardyń mańyzy úlken. Oqýshylarǵa erekshe áser etedi.
«Mundaı sabaqtardy barlyq aýdandarda ótkizý josparlanǵan edi, alaıda qazirgi karantın jaǵdaıynda oqýshylardyń onlaın formatynda oqytýǵa kóshýine oraı ázirge toqtatylyp tur», deıdi B.Belgibekov.
Batys Qazaqstan oblysy
