24 jeltoqsandaǵy jaǵdaı boıynsha Qazaqstanda ótken táýlikte 754 adamnan PTR arqyly Covid-19 indeti anyqtaldy. Al koronavırýs ınfeksııasynyń belgileri bar pnevmonııa boıynsha 156 jaǵdaı tirkelip, 2 adam kóz jumǵan. О́tken aptada bul dert 49 adamnyń ómirin jalmady. Elimizde kúndelikti indetke shaldyqqandardyń sany shamamen 0,51 paıyzǵa ósip otyr. Koronavırýstyń órshý deńgeıiniń kórsetkishi 0,9 paıyzdy quraıdy.
О́ńirlerdegi ahýalǵa toqtalsaq, Densaýlyq saqtaý mınıstrligi Qoǵamdyq densaýlyq saqtaý ulttyq ortalyǵy 22 jeltoqsanda Nur-Sultan qalasy men Batys Qazaqstan oblysy «sary aımaqqa» kirgenin jarııa etti. Buǵan qosa «sary aımaqta» Qostanaı, Aqmola, Soltústik Qazaqstan men Pavlodar oblystary tur. Al «qyzyl aımaqtaǵy» Atyraý oblysyndaǵy jaǵdaı áli turaqtala qoımady. Qalǵan óńirlerdiń bári – «jasyl aımaqta».
«Qyzyl aımaqqa» engen Atyraý oblysyndaǵy indet órship turǵan oryn – «Teńiz» kenishi. Bir táýlikte atalǵan óńirde 62 adam koronavırýs juqtyrsa, sonyń teń jartysy – «Teńiz» kenishiniń jumysshylary. 22 jeltoqsanda bul ken ornyndaǵy ınfeksııalyq stasıonarda jatqan naýqastardyń sany 364 adamǵa jetken. Sondyqtan koronavırýs ınfeksııasynyń taralýyna jol bermeý jónindegi vedomstvoaralyq komıssııanyń (VAK) sheshimimen 25 jeltoqsannan bastap «Teńiz» ken ornynda shekteý sharalary kúsheıtiledi.
Jalpy osy jyldyń 25 jeltoqsanynan bastap 2021 jyldyń 5 qańtaryna deıin oıyn-saýyq, sporttyq jáne basqa da buqaralyq is-sharalardy, onyń ishinde jańa jyldyq erteńgilikter men merekelik korporatıvterdi ótkizýge tyıym salynady. Sondaı-aq bólshek saýda jelisinde antıkovıdti dárilik zattardyń baǵasyn orta eseppen 24%-ǵa tómendetý boıynsha sharalar qabyldanbaq.
Buǵan qosa VAK bilim berý sapasyn qamtamasyz etý maqsatynda qoǵamnyń pikirin eskere kele Bilim jáne ǵylym mınıstrliginiń usynysy boıynsha birqatar sheshim qabyldady. Atap aıtqanda, oqý jylynyń III toqsanynan bastap bitirýshi synyptar úshin (9, 11, 12-synyptar) sanıtarlyq-epıdemııalyq talaptardy saqtaı otyryp, aralas oqytý (pánderdiń 70%-yn – dástúrli formatta, 30%-yn – qashyqtan) qarastyrylady; mektep oqýshylary úshin sabaqtan tys ýaqytta 5 adamnan aspaıtyn toptarda jeke konsýltasııa uıymdastyrylady; II semestrden bastap kolledjder men joǵary oqý oryndarynyń birinshi kýrs stýdentterin aralas oqytý qaıta bastalady.
Búgingi tańda indettiń jaıylý qarqyny odan ári údemes úshin karantın tártibiniń saqtalýy udaıy qadaǵalanýda. Bul maqsatta arnaıy monıtorıng toptary kúsheıtilgen rejimde jumys istep jatyr. 2020 jyldyń 17 tamyzy men 23 jeltoqsan aralyǵynda monıtorıngtik toptar 58 600 reıd júrgizip, 259 711 nysandy tekserdi. Nátıjesinde 20 286 nysanda karantındik sharalardyń buzylǵany anyqtaldy. Maska taǵý rejimin, jumys rejimin, toptyq is-sharalardy ótkizý jáne basqa da tártip buzýshylyqtar boıynsha 18 896 hattama toltyrylyp, 18 588 adamǵa ákimshilik aıyppul salyndy. 2020 jyldyń jeltoqsan aıynyń basynan nysandardy reıdtik tekserýler kóbeıdi.
Almaty qalasynda karantın rejimin buzǵandarǵa 74,7 mln teńge aıyppul salyndy. Bul qalada 8 qazan men 19 jeltoqsan aralyǵynda 590 reıd júrgizilip, sonyń barysynda 4 947 nysan tekserildi. Nátıjesinde karantın sharalaryn buzýdyń 1 065 faktisi anyqtaldy. Karantın sharalaryn saqtamaǵany úshin ákimshilik quqyqbuzýshylyq jóninde 890 hattama toltyryldy. Zańdy jeke tulǵalarǵa jalpy somasy 74,7 mln teńge aıyppul salyndy. Júıeli zańbuzýshylyqtar boıynsha 15 materıal sotqa jiberildi. Sonymen qatar jeke kásipker Renat Bıjanovqa jáne Suddenly JShS-na (Hookan Dreems kafe bary) árqaısysyna 277 800 teńgeden aıyppul salyndy, Túrksib aýdanyndaǵy Namanganskaıa kóshesi, 35 mekenjaıynda boıynsha ornalasqan Atlantis bılıard klýbynyń jáne Medeý aýdanyndaǵy Qaıyrbekov kóshesi, 35a mekenjaıynda ornalasqan Hookan Dreems bar kafesiniń qyzmeti
1 aı merzimge toqtatyldy.
Halqy kóp taǵy bir megapolısimiz Nur-Sultan qalasynda da karantın tártibiniń únemi buzylýyna baılanysty birqatar oıyn-saýyq mekemeleriniń jumysy toqtatylýy múmkin. Búgingi tańda 8 materıal Nur-Sultan mamandandyrylǵan aýdanaralyq ákimshilik sotyna jiberildi. Femıda qyzmetshileri qaraǵannan keıin Alanya túngi klýby men Janym Sol karaoke-barynyń jumysyn toqtatý týraly sheshim qabyldady. Sondaı-aq SOVA karaoke-baryna, Echo baryna, ZOLOTO meıramhanasyna, «Storıs» demalys ornyna qatysty materıaldar qarastyrylýda. Teqila laýndj-baryna eki hattama jasalǵan.
«О́tken demalys kúnderi tizimde kórsetilgen birqatar nysandarǵa qatysty birneshe ret jedel habarlamalar túsip, jospardan tys tekserýler júrgizildi. Sol reıdter barysynda buzýshylyq faktileri rastaldy. Tekserý nátıjeleri boıynsha materıaldar ákimshilik sotqa qosymsha dálel retinde jiberildi», dedi elordanyń bas memlekettik sanıtarlyq dárigeri Janna Pirálıeva.
Sonymen qatar mereke kúnderi Mega Silk Way saýda oıyn-saýyq ortalyǵyndaǵy Kango batýt ortalyǵy men Turan dańǵyly, 21 mekenjaıyndaǵy Icon klýbyna qatysty birneshe ret jedel habarlamalar kelip tústi. Buǵan deıin atalǵan nysandarǵa zańbuzýshylyqty joıý týraly nusqaýlar berilgen edi. Osy nysandarǵa qatysty buıryqty oryndamaǵany úshin ákimshilik quqyqbuzýshylyq týraly hattama qaraýǵa ákimshilik sotqa jiberiledi.
Qalada ákimdik, polısııa, aýdandyq sanıtarlyq-epıdemııalyq baqylaý basqarmalary qyzmetkerleri kásipkerlik sýbektilerine karantın jáne shekteý sharalarynyń saqtalýyna baılanysty udaıy baqylaý júrgizýde. Shildeden bastap osy ýaqytqa deıin
1 297 jeke, laýazymdy jáne zańdy tulǵalar 261 buzýshylyqtary úshin
296 654 teńgege ákimshilik jaýapkershilikke tartyldy.
Indettiń aldyn alatyn, betin qaıtaratyn birden-bir «qarý» vaksına ekeni anyq. Bul baǵyttaǵy jumystardan oń ózgeris baıqalady. 19 jeltoqsanda otandyq QazCovid-in vaksınasyn klınıkalyq synaqtan ótkizýdiń sońǵy III satysy bastaldy. Onyń sheńberinde jeltoqsannyń sońynda deıin 3 myń erikti azamatqa ekpe egiledi. Alǵashqy eriktilerge Almaty jáne Taraz qalalarynyń klınıkalarynda, ǴZI-da vaksına egildi. 2021 jyldyń naýryz aıynda Jambyl oblysy Qordaı aýdanynda jylyna qýaty 60 mln mólsherde vaksına shyǵarýǵa jetetin bıofarmasevtıkalyq zaýyt paıdalanýǵa beriledi. Buǵan qosa Qaraǵandy qalasynda reseılik «Spýtnık V» vaksınasyn shyǵarý óndirisi iske qosyldy.
