Qaryz mólsherin azaıtyp, ony tóleý merzimin keıinge qaldyrý sharalary qolǵa alyndy. Qazan aıynda 750 mln AQSh dollary kóleminde 12,5 jyldyq eýrooblıgasııa shyǵarylymy oıdaǵydaı ornalastyryldy. Kompanııa túsken qarajatty 2022 jáne 2023 jyldary ótelýge tıis eýrooblıgasııalardy merziminen buryn óteýge paıdalandy. Nátıjesinde, kompanııanyń aldaǵy birneshe jylda eýrooblıgasııalardy óteý boıynsha qomaqty bir rettik shyǵyndary joq.
Ortalyq apparat ońtaılandyryldy
Sáýir aıynda jańa uıymdyq qurylym bekitildi. Soǵan sáıkes QMG ortalyq apparatynda jumys isteıtin qyzmetkerler sany 249 adamǵa nemese 34%-ǵa, ıaǵnı 729 adamnan 480 adamǵa azaıdy.
Mamyr aıynda kompanııa basshylyǵynyń jalaqysy 30%-ǵa, orta býyn basshylardyń eńbekaqysy 20%-ǵa azaıǵany jóninde jarııalady.
Sonymen qatar ortalyq apparatta basqarýshy dırektor degen laýazym múldem joıyldy, departament sany úsh esege, 60-tan 20-ǵa deıin qysqardy. Budan bólek QMG jyl sońyna deıin ortalyq apparat qyzmetkerlerine tólenetin bonýs pen syıaqylardy alyp tastady jáne qyzmettik kólikterden bas tartty.
Aýqymdy dıvıdend tólendi
Mamyr aıynda shyǵyndardyń qysqarýyna qaramastan, Memleket basshysynyń tapsyrmasy aıasynda aksıonerlerge 2019 jylǵa 81,7 mlrd teńge mólsherinde dıvıdend tóleý týraly sheshim qabyldandy. Bul – aldyńǵy jylmen salystyrǵanda eki ese kóp qarjy. 2019 jyldyń qorytyndysy boıynsha dıvıdend tóleýmen qatar QMG óz aksıonerlerine Nur-Sultan men Túrkistan qalalaryndaǵy áleýmettik nysandardyń qurylysyna arnalǵan qarajatty qosa alǵanda, 20 mlrd teńge aqsha tóledi.
Eleýli oqıǵalar
Maýsym aıynda Mańǵystaý oblysynyń Shyǵys Bekturly barlaý blogynda munaı burqaǵy atqylady. Debıti táýligine 100 tekshe metrge deıingi «qara altyn» tarıhı derekterdi keshendi geologııalyq-geofızıkalyq zertteý, basseındik úlgileý, joǵary tehnologııalyq seısmobarlaý jumystarynyń nátıjesinde alyndy.
Al jeltoqsan aıynda Shyǵys О́riktaý ken ornynda eki uńǵyma tájirıbelik paıdalanýǵa berildi. Bir jyldan keıin taǵy da bes uńǵyma iske qosylmaq. Joba tabysty iske asyp, oń ekonomıkalyq ahýal qalyptasqan jaǵdaıda osy ken ornynda taǵy 58 uńǵymany paıdalaný múmkindigi qarastyrylady. Jumystar sátti ótkizilgen jaǵdaıda, kenishtegi óndiris kólemi jyl saıyn 1,5 mlrd tekshe metr gaz jáne 500 myń tonna munaıǵa deıin jetýi múmkin.
«Saryarqa» iske qosyldy
Tamyz aıynda Nur-Sultan qalasynda jekemenshik úı ıelerinen ortalyq gazben qamtýdyń ortalyqtandyrylǵan júıesine qosylýǵa ótinim qabyldana bastady. О́tinimdi elordanyń gazdandyrylǵan turǵyn úı alqaptarynda ornalasqan zańdy tulǵalar da bere alady.
Eske sala keteıik, «Saryarqa» magıstraldy gaz qubyrynyń qurylysy 2019 jyldyń sońynda aıaqtaldy. Gaz qubyry Qaraǵandy men Aqmola oblysynyń 171 eldi mekenin gazben qamtamasyz etedi.
Qordaı turǵyndary kógildir otynmen qamtyldy
Táýelsizdik kúni qarsańynda Jambyl oblysy Qordaı aýdanynyń on eldi mekeni nemese 62 myńnan astam turǵyny men 274 áleýmettik nysan kógildir otynǵa qosyldy. 2020 jyldyń maýsym-qazan aılarynda barlyǵy 392 shaqyrym gaz qubyry tartylǵan bolatyn. Osy jumystyń nátıjesinde qordaılyqtardy kógildir otynmen qamtý kórsetkishi 47%-dan 95%-ǵa deıin artty.
Indetpen kúreske qarjylaı qoldaý kórsetildi
«QazMunaıGaz» kompanııalar toby halyqqa, oblys ákimdikterine jáne medısınalyq mekemelerge 3,6 mlrd teńgege demeýshilik kómek kórsetti. Atalǵan qarajatqa ókpeni jasandy jeldetý apparattary, ottegi konsentratorlary, jedel járdem kólikteri jáne jeke qorǵanys quraldary satyp alyndy. Budan bólek, juqpaly indetpen kúreste eren eńbek etip júrgen aq halatty abzal jandarǵa, polısııa qyzmetkerlerine ystyq tamaq jetkizip berý uıymdastyryldy.
