– Ishki ister organdaryna renishim de, kúdigim de bar. Búgin polısııadan bir kisi keldi, ashý ústinde ol kisige de: «Organnyń ishinde urylarmen sybaılasqan adamdar bar», – dep aıtyp tastadym. Ol kisi: «Orynsyz jala jappańyz, bulaı deýge qandaı quqyńyz bar? Dálelińiz joq», – deıdi. Sol dálelim bolmaǵan soń júre almaı otyrmyn ǵoı. Dálelim bolsa, men bulaı otyrmas edim. Osy óńirde jyl saıyn tabyn-tabyn jylqy iz-túzsiz ketedi. Ne jylqy tabylmaıdy, ne ury ustalmaıdy. Jalaqor jan emespin, janymdy jegideı jep, kóńilde kólkip turyp alǵan kúdigimdi aıtyp otyrmyn. О́ıtkeni bul jaqta jyl saıyn júzdep jylqy joǵalyp jatady. Sonyń bireýi de tabylǵan emes. Osy tóńirektegi eldiń bári biledi, sońǵy eki-úsh jyldyń ishinde Kıev aýylynan 100 basqa jýyq, Sývorov aýylynan 50 bas jylqy ushty-kúıli joǵaldy. Eshkim kórmeıdi, eshkim bilmeıdi. Jerdiń astynan ótip ketpese, tabyndaǵan jylqyny ushyp bara jatsa da bireý-mireý kóredi ǵoı, – deıdi ashynǵan ana.
Halıda Baımuratova – jeti bala tárbıelep otyrǵan kóp balaly ana. 2018 jyly memlekettik baǵdarlama boıynsha jyldyq ósimpuly 4 paıyzdyq 2 mln 600 teńge jeńildetilgen nesıe alyp, qymyz óndirisin qolǵa alý maqsatynda 12 bas jylqy satyp alǵan. Bıyl kúzde qolyndaǵy qambar ata tóliniń uzyn sanyn 32-ge jetkizdi. Munyń syrtynda, aýyl turǵyndary aqysyn tólep, baǵyp ber dep tabynǵa qosqan 10 shaqty jylqy taǵy bar. Nesıeden qutylyp, nesibeme jetsem eken dep otyrǵan kóp balaly otbasy bir túnde 42 bas jylqydan túgel aıyrylyp, aýyl turǵyndaryna da, bankke de qaryz bolyp qaldy. Aýyl turǵyndary ázirshe jylqylaryn surap otyrǵan joq, biraq amanattap tapsyrǵan maldy ury alsa da, qasqyr jese de, qunyn túbi ıesine qaıtaryp berý kerek.
– Jylqylardy kún saıyn keshkilik qamap júretinbiz. 30 qyrkúıek kúni joldasym jumystan kesh kelip, taba almaı qaldy. Sóıtip, saıǵa túsken shyǵar, qarańǵyda báribir taptyrmaıdy ǵoı, tańerteń izdermin dep úıge keldi. Ertesi kúni tańerteńnen bastap 4 kún boıy izdedik, tabylmaǵan soń 5 qyrkúıek kúni polısııaǵa habar berdik. Áli nátıje joq. Kún sanap úmit kemip, kúdik kúsheıip barady. О́zińiz oılap kórińizshi, máselen, men bir jerden 10 jylqy urlap ákeldim deıik. Artymdy bireý jaýyp otyrmasa, men ol jylqyny qaıda tyǵyp, qaıda satyp úlgeremin. Úıde ustaı almaısyń, bazarǵa apara almaısyń. Bul jerde urylardyń artyn jaýyp otyrǵan bir kúsh bar. Polısııa meniń qaltamdaǵy aqsha taýsylǵansha ǵana izdedi. Alǵashqy úsh kún polısııa óz kúshimen izdedi. Odan keıin polısııanyń kóligine ózimiz benzın quıyp berip otyrdyq. Eki aıdan soń aqsha da bitti, izdeý de toqtady, – deıdi joq izdegen ana.
Istiń mán-jaıyn oblystyq polısııa departamentinen surap kórip edik, baspasóz qyzmetiniń basshysy Irına Bejenar: «Uzynkól aýdany Novopokrov aýylynyń 39 jastaǵy turǵyny aýdandyq polısııa bólimine 2020 jyldyń 5 qazanynda shaǵym túsirip, 42 bas jylqysynyń joǵalǵany týraly habarlaǵan. Shaǵymdanýshynyń sózinshe, jylqy 29 qyrkúıek kúni Voskresenov aýylynyń mańynda erkin jaıylyp júrgen jerinen joǵalǵan. Mal ıesi 5 kún boıy óz betinshe izdep, taba almaǵan. Joqshy mal joǵalǵan kúni birden polısııaǵa habarlaǵanda, múlde basqasha bolar ma edi. Atalmysh fakti boıynsha Qylmystyq kodekstiń 188-1-babynyń 4-bólimi, 2-tarmaǵy boıynsha qylmystyq is qozǵaldy. Izdestirý sharalaryna arnaıy mobıldi toptar tartylyp, olar Uzynkól, Sarykól aýdandaryndaǵy egistik jáne ormandy alqaptardy tegis súzip shyqty. Áýeden izdeıtin arnaıy drondar paıdalanyldy. Oblystyń barlyq polısııa bólimderine, sondaı-aq irgedegi Soltústik Qazaqstan oblysynyń Jambyl aýdandyq polısııa bólimine, shekaralas jatqan Qorǵan oblysyna qarasty Zverınogolov, Polovın aýdandarynyń polısııa bólimshelerine habar jiberildi. Tergeý áli júrip jatyr. Jábirlenýshige kelgen zııan kólemi 15 mln teńge», – dedi.
Mal ıesiniń esebinshe, urlanǵan jylqynyń jalpy quny 22 mln teńgege jaqyndaıdy. Halıda Baımuratova endi bankke bereshek 1 mln teńgeden astam qarjyny qaıdan tabaryn bilmeı dal. Aýdan ákimi Murat Sandybaevqa jolyǵyp jaǵdaıyn aıtyp, bank bereshegin bir jylǵa keıinge shegerýge kómektesýin ótingen eken, ol kisi kásipkerler palatasyndaǵy zańger mamandarmen aqyldasyp kóreıik, qoldan kelgenshe kómektesemin degen ýáde beripti.
Al iz-túzsiz ketken jylqydan áli habar joq. Halıdanyń aıtýynsha, Novopokrovtan jeti shaqyrym jerde jatqan Voskresenov aýylynda turatyn áıel joǵalǵan jylqyny 30 qyrkúıek kúni keshke taman jergilikti tabynshynyń kólikpen qaıyryp júrgenin kóripti. Biraq bul kýágerdiń sózine polısııa senbeı otyrǵan kórinedi.
Qostanaı oblysy
