Aqylǵa syıymsyz bolyp kórinetin osy bir ermek bizdiń elde asa tanymal bolmaǵanymen, Eýropa men Amerıkada tabysty sport túri sanalady. Bul nátıje azýy aıbarly Aleksandrdyń alǵashqy rekordy emes, ol buǵan deıin de osy jolǵy nátıjege jeteqabyl óner kórsetip, sheteldik áýesqoılardy tańǵaldyrǵan bolatyn. Alǵan betinen qaıtpaıtyn qaısar jigit bul joly salmaǵy zil batpan temir vagondy eki jarym metrge deıin súıredi.
– Bala kúnimnen bul iske erekshe qumarttym. Ǵalamtor keńge qanat jaıǵaly beri amerıkalyqtardyń kólikti qalaı súırep jatqanyn únemi tamashalaıtyn boldym. Qyzyǵýshylyǵym oıanyp, jeńil kólikterdi tisimmen jyljyta bastadym. Nátıjesinde, osy deńgeıge jettim. Bul jattyǵýdy oryndaý óte kúrdeli ári uzaq ýaqytty qajet etedi. Mundaı jattyǵýdy eshkimge qaıtalamaýǵa keńes beremin, – deıdi rekordshy.
Qazaqstan rekordtar kitaby tirkeý departamentiniń dırektory Baqytjan Tastúlekovtiń sózinshe, bizdiń elimizdiń rekordtar kitabynyń basqa rekordtar kitaptarynan ereksheligi adam densaýlyǵyna zaqym keletin jaıttar jetistik retinde tirkelmeıdi. Biraq tispen aýyr kólikter men vagondardy súıreý álem elderinde áldeqashan sport retinde moıyndalǵandyqtan, Aleksandr alǵa qoıǵan maqsatyna qol jetkizip otyr. Munymen toqtap qalmaımyn degen ol osy ónerimen alty qurlyqty moıyndatýdy armandaıtynyn aıtady.
ALMATY
