«Batysta Bozjyra men Sherqala, kúngeıde Aqsý-Jabaǵyly men Saıram-О́gem, Jetisýda Han Táńiri men Sharyn, Kólsaı men Qaıyńdy, Qapal- Arasan, Altynemel men Burhan bulaq, shyǵysta Muztaý men Shyńǵystaý, Marqakól men Rahman qaınary, Arqada Býrabaı men Baıanaýyl, Ulytaý men Qarqaraly, teriskeıde Imantaý men Aıyrtaý jáne basqa da kórikti jerlerimiz jetip artylady. Jer jánnatyn alystan izdeýdiń qajeti joq. Bári ózimizde bar. Jastarǵa osyndaı keremet tabıǵatymyzdy tanytyp, ony qadirleýge baýlýymyz kerek», - dedi Memleket basshysy.
Qasym-Jomart Toqaev ýaqyt uttyrmaı qolǵa alyp, dáıekti túrde iske asyratyn taǵy bir sharýa bar ekenin aıtty. Ol - halyqtyń qalalyq jerlerge jappaı kóshýi saldarynan kóptegen aýyldarda, ásirese, shekara mańyndaǵy eldi-mekenderde turǵyndar sany kúrt azaıýy.
«Biz eńbek kúshi kóp ońtústik óńir turǵyndarynyń soltústik jáne shyǵys aımaqtarǵa qonystanýyna qolaıly jaǵdaı jasap, osy jumysty nazarda ustaımyz. Bul – óte ózekti ári elimizdiń qaýipsizdigine qatysty másele. Buǵan qosa sońǵy jyldarda túrli sebepterge baılanysty báseńdep qalǵan qandastar kóshin barynsha qoldap, olardy joǵaryda aıtylǵan óńirlerge ornalastyrýdy jandandyramyz», - dedi Prezıdent.
Qasym-Jomart Kemeluly bul eki máseleniń de strategııalyq mańyzy baryn, sondyqtan oǵan kezekti naýqan retinde qaraýǵa bolmaıtynyn da basa aıtty.
«Jergilikti bılik mundaı jumystardy joǵaryǵa kópirgen aqpar berý úshin emes, memlekettik múdde jáne aǵaıynǵa shynaıy janashyrlyq turǵysynan jasaýǵa tıis», - dedi Memleket basshysy.
