Táýelsizdik dáýirinde ana tilimizdi damytý úshin barlyq jaǵdaıdyń jasalǵanyn alǵa tartqan Memleket basshysy osy aralyqta qazaq tilinde bilim beretin mektepter men oqý oryndarynyń, balabaqshalardyń sany eselep kóbeıgenin atap ótti.
«Búginde memlekettik tildi biletin qazaqtyń da, ózge etnos ókilderiniń de úlesi edáýir artty. Qazaq tilin, shyn máninde, búkil halqymyzdy biriktirýshi faktorǵa aınaldyrýdyń barlyq quqyqtyq tásilderi jáne kepildikteri qalyptasty. Másele – nıette. Nıettiń durys bolýy qazaq tilin meńgergisi keletin adamdarǵa da, osy maqsatqa jetýge jaǵdaı jasaıtyn Úkimetke de baılanysty», - dedi Qasym-Jomart Toqaev.
Prezıdenttiń aıtýynsha, til ıgerý úshin balalar ádebıetiniń atqaratyn róli zor. Sondyqtan qazaq qalamgerleriniń úzdik shyǵarmalaryna qosa, balalarǵa arnalǵan shetel jazýshylarynyń da tańdaýly týyndylaryn aýdaryp, kóptep basyp shyǵarýdy jáne taratýdy qolǵa alǵan jón. Oǵan suranys ta zor.
Memleket basshysy qazaq tilin bilý – Qazaqstannyń árbir azamatynyń paryzy, tipti mindeti dep te aıtýǵa bolatynyn jetkizdi.
«Osy oraıda men barsha qazaqstandyqtarǵa, onyń ishinde qazaq tilin áli jete meńgermegen otandastaryma úndeý tastaǵym keledi. Jastar aǵylshyn tilin nemese basqa da tilderdi az ǵana ýaqytta meńgere alatynyn kórip otyrmyz. Tutas býyn almasqan osy jyldarda qazaq tilin úırengisi kelgen adam ony áldeqashan bilip shyǵar edi. Halqymyzda «Eshten kesh jaqsy» degen sóz bar. Eń bastysy, ynta bolýy kerek», - dedi Prezıdent.
Qasym-Jomart Kemeluly ana tilimizdi keńinen qoldaný – basqa tilderge, ásirese orys tiline shekteý qoıylady degen sóz emes ekenin de atap ótti.
Prezıdenttiń aıtýynsha, barsha etnos ókilderiniń ana tilin, salt-dástúrin damytýǵa múmkindik jasala beredi. Sondaı-aq, maqalada jastarǵa birneshe til bilý ózderiniń kókjıegin keńeıtip, kókirek kózin oıatatynyn jete túsingeni abzal ekeni de basa aıtylǵan.
