Máýlen Áshimbaev Prezıdentimiz búginge deıingi jetistikterimizdi oı eleginen ótkizip, aldaǵy maqsat-mindetterge nazar aýdarǵanyn atap ótti.
«Memlekettilikti nyǵaıtý, táýelsizdikti saqtaý, ultty ulyqtaý baǵyttary boıynsha tıisti organdarǵa naqty tapsyrmalar da berilgen. Sondyqtan bul eńbekti baǵdarlamalyq qujattyń júgin arqalaǵan dúnıe deýge tolyq negiz bar», dedi Senat tóraǵasy.
Onyń aıtýynsha, maqalada egemen elimizdiń baǵyt-baǵdary, qoǵamdy alańdatqan ózekti máseleler, jahandaný dáýirindegi jańa syn-qaterler boıynsha suraqtarǵa naqty jaýap berilgen. Ásirese, memlekettiń jerine qatysty keltirilgen paıymdar halyq tarapynan tolyq qoldaý tabýda. Memleket basshysy atap ótkendeı, shyn máninde, bizge osynaý ulan-ǵaıyr aýmaqty syrttan eshkim syıǵa tartqan joq. Bul jer – ejelden qazaqtyń ata qonysy, qasterli mekeni.
«Memlekettik tildi damytýǵa, qandastar kóshin ári qaraı jandandyrýǵa, shekara mańyndaǵy aýyldardy órkendetýge qatysty aıtylǵan usynystar jurtshylyqtyń erekshe qyzyǵýshylyǵyn týdyryp otyr. Oǵan maqala jarııalanǵaly beri buqaralyq aqparat quraldary men áleýmettik jelilerde aıtylyp, jazylyp jatqan pikirler aıqyn dálel. Naýryz meıramyn atap ótýdiń jańa tujyrymdamasyn daıyndaý bastamasy da halyqtyń bereke-birligin nyǵaıtý jolyndaǵy mańyzdy qadam ekeni anyq. Prezıdentimizdiń Alash arystarynyń asyl murasyn ıgerý jalǵasa beretini týraly aıtqan sózi de kópshiliktiń kóńilinen shyqqany daýsyz», dep jazdy Máýlen Áshimbaev.
Senat spıkeri bıyl Táýelsizdigimizdiń 30 jyldyǵymen birge azattyqtyń aq tańyn jaqyndata túsken Jeltoqsan oqıǵasynyń 35 jyldyǵy týraly da sóz etti.
«Halqymyzdyń basynan ótken alapat asharshylyqtyń alǵashqy kezeńi – 1921-1922 jyldardaǵy náýbetten beri de 100 jyl ótti. Sondaı-aq, álemdik shejirede teńdessiz sheshim bolyp sanalatyn Semeı polıgonynyń jabylǵanyna 30 jyl tolady.Munyń bári bizdiń tarıhymyz. Al, tarıhty dáripteý – barshamyzdyń abyroıly mindetimiz. Sol sebepti, Prezıdentimiz ultymyzdyń ótkenine táýelsiz kózqaraspen qaraıtyn kez kelgenin, ǵalymdarymyz ben tarıhshylarymyz bul baǵytta aýqymdy jumys atqarý qajettigin naqty atap ótti. Osy oraıda Memleket basshysynyń fılm túsirý isinde tarıhı taqyryptarǵa basymdyq berý týraly tapsyrmasynyń mańyzy zor», dedi ol.
Máýlen Áshimbaev Prezıdent maqalasynda aıtylǵan jalań uranǵa boı aldyrý jaıyn da sóz etti. Sondaı-aq, maqaladaǵy qorshaǵan ortany qorǵaýǵa qatysty aıtylǵan oılar tabıǵatty aıalaýda ár azamat jaýapty ekenin jáne árkim naqty ispen úles qosý qajettigin anyq kórsetetinin de atap ótti.
«Qasym-Jomart Kemeluly maqalada saıası-ekonomıkalyq reformalardyń da júıeli túrde jalǵasatynyn qadap aıtty. Osy baǵyttaǵy aýyl jáne kent ákimderin saılaý bastamasy elimizde saıası jańǵyrýdyń jańa kezeńine jol ashady dep senemiz. Prezıdentimiz aıtqandaı, bizdiń maqsatymyz – keler býynǵa Qazaqstandy tuǵyry berik, ekonomıkasy qýatty, rýhy asqaq memleket retinde tabystaý jáne sol isterdi laıyqty jalǵastyratyn jasampaz urpaq tárbıeleý. Mundaı jumystarǵa árqaısymyz atsalysýymyz qajet», dep jazdy Senat tóraǵasy.
M.Áshimbaev óz jazbasynda Memleket basshysy atalǵan maqala arqyly memlekettilikti kúsheıtýge jáne ıdeologııalyq jumystarǵa qatysty elimizdiń aldynda turǵan negizgi basymdyqtardy anyqtap bergenin basa aıtty.
«Bul baǵyttaǵy barlyq bastamany tabysty iske asyrý úshin Senat zańnamalyq turǵydan qoldaý kórsetýge, táýelsizdigimizdiń qadir-qasıetin arttyrýǵa jáne eldigimizdi eńseli etýge óz úlesin qosady», dep túıindedi Senat spıkeri.
