Jańa jyl qarsańynda búkil el boıynsha 30 myńǵa jýyq polısııa men Ulttyq ulannyń áskerı qyzmetkerleri azamattardyń qaýipsizdigin qamtamasyz etip, kúsheıtilgen rejimde qyzmet atqardy. Jedel basqarý ortalyǵynyń qyzmetkerleri qalalar men oblys ortalyqtarynyń kóshelerindegi jaǵdaıdy jiti baqylady.
IIM basshysy Erlan Turǵymbaev elordalyq garnızon bólimshelerine baryp, mereke kúnderi qyzmet atqarǵan narıadtardyń jumysyn tekserdi.
– Nur-Sultan qalasynyń kóshelerinde bir jarym myń polıseı qyzmet atqarýda. Jedel basqarý ortalyǵy qaladaǵy jaǵdaıdy baqylaýdy turaqty qamtamasyz etedi. Olar kelip túsken barlyq qońyraýlarǵa jedel jaýap beredi. Shaqyrtýlardyń basym bóligi tynyshtyqty buzý, otbasylyq janjaldar, qaraýsyz qalǵan zattar men shaǵyn jol-kólik oqıǵalary sııaqty ákimshilik quqyq buzýshylyqtarǵa qatysty, – dep atap ótti mınıstr Erlan Turǵymbaev.
Tártip saqshylary elimizdiń barlyq aımaqtarynda merekelik demalys kúnderi negizinen usaq urlyqtar, turmystyq janjaldar men tynyshtyqty buzý sııaqty derekterdi tirkedi.
Nur-Sultanda Jańa jyl qarsańynda polısııanyń «102» shuǵyl shaqyrtý pýltine eki myńnan astam qońyraý tústi. Jyl basynan beri elordalyq polıseıler 10 mas júrgizýshini ustady.
Qostanaı oblysynda jumys kúnderi kezekshi bólimge orta eseppen 400 habarlama kelip túsedi. Al 1 qańtarda polıseıler 650 qońyraý qabyldady. Oblys ortalyǵynda demalys kúnderi 28 jol-kólik oqıǵasy oryn aldy.
Jańa jyl kúnderi Semeıdegi «102» pýltine bir jarym myńnan astam qońyraý tústi. Onyń 20-sy qylmystyq quqyq buzýshylyq faktisi bolyp tabylady.
Túrkistandaǵy «102» pýltine qańtar aıynyń alǵashqy úsh kúninde 100-den astam qońyraý kelip tústi. Munda tártip saqshylary 300-ge jýyq ákimshilik quqyq buzýshylyqty tirkedi. Olardyń basym kópshiligi jol qozǵalysy erejeleriniń buzylýymen baılanysty.
Qyzylorda oblysynda jańa jyldyń alǵashqy kúnderinde polısııa qyzmetkerleri 34 qylmystyq quqyq buzýshylyqty tirkedi. Olardyń 23-i tez arada ashyldy.
Qoǵamdyq oryndarda mas kúıinde 50 adam ustaldy. Tynyshtyqty buzýdyń 10 faktisi anyqtaldy. Bes júrgizýshi mas kúıinde kólik tizgindese, al 44 júrgizýshiniń qujattary joq bolyp shyqqan.
