Buǵan deıin mamandar júrgizgen taldaý nátıjesi kóńil kónshitpeıdi. Qala mektepterindegi sport alańdarynyń 90 paıyzy eskirip, zamanaýı talaptarǵa múldem saı kelmeıtini anyqtalǵan. Jaryqtandyrýdyń nasharlyǵy men qaýipsiz jabynnyń joqtyǵy órenderdiń sportqa degen yntasyn tejep kelgen. Osy túıtkildi sheshý maqsatynda «Qazaqstan halqyna» qory Temirtaýda «tolyq qamtý» modelin iske asyrdy. Bul – jekelegen nysandardy emes, tutas bir qalanyń sporttyq ınfraqurylymyn keshendi túrde jańartýdyń biregeı tájirıbesi.
Qaraǵandy oblysynda Qor jalpy somasy 24 mlrd 750 mln teńgege 33 áleýmettik jobany ıgerip jatyr. Qomaqty qarajattyń eleýli bóligi – 2,5 mlrd teńgesi tikeleı Temirtaýdyń sporttyq ınfraqurylymyna baǵyttaldy. Bul ınvestısııanyń 2,4 mlrd teńgesin «Qazaqstan halqyna» qory bólse, 100 mln teńgesin seriktes «Batyr bolamyn» qory qamtamasyz etti. Nátıjesi de kóp kúttirgen joq. Nebári úsh aıdyń ishinde qalanyń 30 mektebinde zamanaýı sport keshenderi boı kóterdi. 30 fýtbol alańy, 28 basketbol-voleıbol alańy, 29 workout jattyǵý aımaǵy, 5 hokkeı korty, 30 sekirý aımaǵy men kedergiler jolaǵy oqýshylar ıgiligine berildi.
Tehnologııalyq sapasyna keletin bolsaq, mektep aýlasyndaǵy jabdyqtar halyqaralyq standarttardan kem túspeıdi. Máselen, basketbol qalqandary NBA deńgeıindegi brondalǵan shynydan jasalsa, alań boıaýy 600 gradýs temperatýrada kúıdirilip basylǵan. Bul atalǵan nysandar kem degende aldaǵy on jyl boıy jańartýdy qajet etpeı, urpaq ıgiligine qyzmet etedi degen sóz.
Jobanyń mańyzy týraly «Qazaqstan halqyna» qorynyń basqarma múshesi Serikbek Elshibekov: «Bizge árbir balanyń sportpen aınalysýǵa múmkindigi bolýy – basty mindet. Prezıdentimiz Qasym-Jomart Toqaev atap ótkendeı, sport ásirese shaǵyn qalalar men aýyldyq jerlerde qoljetimdi bolýǵa tıis. Biz ornatqan jabdyqtardyń sapasy tipti megapolısterdegi kásibı klýbtardan kem túspeıdi. «Batyr bolamyn» qorymen birlesip, elimiz kóleminde 200-den astam sport zalyn saldyq. Sol jerlerden búginde álem chempıondary shyǵyp jatyr. Temirtaýda dop teýip júrgen búgingi jas jetkinshekterdi jaqyn arada halyqaralyq arenalardan kóretinimizge senimim kámil. Maqsatymyz – árbir balanyń turǵylyqty jerine qaramastan, eń zamanaýı alańdarda jattyǵýyna jaǵdaı jasaý», deıdi.
Temirtaý qalasynda tórt kúnge sozylǵan tartysty doda «Qazaqstan halqyna» qory kýbogi» óz máresine jetti. Jarysqa qatysqan barlyq komandalar jańa alańdarda óz sheberlikterin ortaǵa salyp, sportqa degen joǵary yntasyn kórsetti. Týrnır qorytyndysynda jeńis tuǵyrynan kóringen úzdikter anyqtaldy. 6-7 synyp oqýshylary arasynda №17 mektep komandasy top jaryp, altynnan alqa taqty. Ekinshi oryndy №12 mektep ıelense, úzdik úshtikti №2 mektep túıindedi. 8-10 synyp oqýshylary arasyndaǵy básekede Bilim-ınnovasııa lıseıiniń órenderi qarsylas shaq keltirmeı, jeńimpaz atandy. Kúmis júlde №17 mektepke buıyrsa, Á.Bókeıhan atyndaǵy gımnazııa oqýshylary qola júldeni qanaǵat tutty.
Júldegerlerge aqshalaı syılyqtar, jańa sporttyq formalar, sómkeler men doptar tabystaldy. Marapattar jas talanttarǵa úlken qoldaý ári aldaǵy halyqaralyq jarystarǵa daıyndyqtyń bastaýy bolmaq.
Bul bastama Temirtaýmen ǵana shektelmeıdi. Buǵan deıin osyndaı nysandar Qaraǵandy, Shahtınsk, Saran, Balqash, Jezqazǵan qalalaryndaǵy arnaıy mektep-ınternattar men balalardy qoldaý ortalyqtarynda salynǵan bolatyn. Qazirgi tańda jańa alańdar tek deneshynyqtyrý sabaqtaryna ǵana emes, seksııalar men mektep janyndaǵy lagerlerdiń jumysyn jandandyrýǵa, buqaralyq sportty jańa beleske kóterýge múmkindik berip otyr.
Qaraǵandy oblysy,
Temirtaý qalasy
