Halyqaralyq Túrki akademııasynyń prezıdenti Darhan Qydyráliniń aıtýynsha, atlas Táýelsizdigimizdiń 30 jyldyǵyna oraılastyrylyp shyǵarylǵan.
Jınaq Qazaqstannyń Tuńǵysh Prezıdenti Nursultan Nazarbaevtyń alǵysózimen shyqqan. Sonymen birge áıgili saıahatshylar men jıhankezder daıyndaǵan kóne kartalar men ata-babalarymyzdyń mol murasyn kórsetetin mańyzdy málimettermen tolyqtyrylǵan.
«Taıaýda ǵana Memleket basshysy Qasym-Jomart Toqaevtyń «Táýelsizdik bárinen qymbat» atty maqalasy shyqqany belgili, sonymen tustas kelýiniń de máni zor dep esepteımiz. Sebebi maqalada Prezıdent bizge bul jerdi eshkim syıǵa tartqan joq dep aıtty. Búgingi atlas − onyń jarqyn aıǵaǵy. О́ıtkeni atlasta 200-den astam karta men tarıhı qujattar bar jáne osy geografııalyq aýmaqtaǵy tarıhı-mádenı jetistikterdi pash etedi. Jalpy atlas Elbasynyń alǵysózimen shyqty jáne Elbasynyń Túrki keńesi sammıtinde bergen tapsyrmasy negizinde jaryq kórdi», dedi Darhan Qydyráli.
Budan ózge, halyqaralyq konferensııada TúrkPA uıymynyń Bas hatshysy Altynbek Mamaıýsýpov oqyrmanǵa jol tartqan basylymdy joǵary baǵalap, Memleket basshysy Q.Toqaevtyń baǵdarlamalyq maqalasyndaǵy oramdy oılardyń tarıhy ortaq baýyrlas elder úshin mańyzdy ekenin tilge tıek etti.
Al Túrki keńesiniń Bas hatshysy Halıl Akynjy qazirgi Sibir, Mońǵolııa jerlerinen Qara teńiz ben Jerorta teńizine deıingi alyp aýmaqty qonystaǵan túrki halyqtarynyń myńdaǵan jyldar boıy saqtalyp kele jatqan biregeı mádenıetine toqtaldy.
«Búginde jeti túrki memleketiniń baıraǵy asqaq rýhpen jelbirep tur. Endi olardy eshkim qulata almaıdy», dedi beınebaılanys arqyly baıandama jasaǵan H.Akynjy.
О́z kezeginde Ázerbaıjannyń alǵashqy Úkimet basshysy Gasan Gasanov jıyn qatysýshylaryn alǵashqy tarıhı-mádenı atlastyń jaryq kórýimen quttyqtap, Halyqaralyq Túrki akademııasyna rızashylyǵyn bildirdi.
Odan bólek, alqaly jıynǵa Túrki keńesi Bas hatshysynyń orynbasary О́mer Kodjaman, Ázerbaıjan Respýblıkasynyń Qazaqstandaǵy tótenshe jáne ókiletti elshisi Rashad Mammadov, Túrkııa Respýblıkasynyń Qazaqstandaǵy tótenshe jáne ókiletti elshisi Ýfýk Ekıdjı, Qyrǵyz Respýblıkasynyń Qazaqstandaǵy tótenshe jáne ókiletti elshisi Jeenbek Kýlýbaev, Frankfýrt ýnıversıtetiniń professory, Reseı ǵylym akademııasy Sibir bólimshesiniń fılologııa ınstıtýtynyń bas ǵylymı qyzmetkeri Irına Nevskaıa jáne ózge de túrkitanýshy ǵalymdar men sarapshylar, qoǵam jáne memleket qaıratkerleri qatysty.
