«Sizder halyqtyń senimin aqtaýlaryńyz kerek. Bul - mańyzdy mindet ári úlken jaýapkershilik. Sondyqtan fraksııa depýtattary bizdiń partııanyń saılaýaldy baǵdarlamasynda kórsetilgen maqsattarǵa jetý úshin bar kúsh-jigerin salýy tıis», dedi Elbasy. Qazaqstannyń Tuńǵysh Prezıdenti «Nur Otan» partııasynyń eldiń údemeli damýyn qamtamasyz etý jáne halyqtyń ál-aýqatyn arttyrý baǵytyndaǵy jumysynyń nátıjelerin atap ótti.
«Bizde álemniń damyǵan 30 eliniń qataryna enerlik naqty jospar men resýrstar bar. Bul jolda eń úlken parlamenttik fraksııa retinde sizderge úlken jaýapkershilik júkteledi. Alǵa qoıylǵan mindetterdi oryndaý úshin sizder barlyq kúsh-jigerdi salar degen senimdemin. Depýtattar quramy ózgergenin bári biledi. Jańa adamdar jańa ıdeıalar ákelip, Parlament jumysyna tyń serpin berer dep senemin», dedi partııa tóraǵasy.
Nursultan Nazarbaev VII shaqyrylymdaǵy Májilis jumysynyń Qazaqstan Táýelsizdiginiń 30 jyldyǵymen tuspa-tus bastalyp otyrǵanyn da erekshe atap ótti.
«Qazaqstan halqy ótken saılaýda bizdiń partııaǵa úlken qoldaý kórsetti. Halyqaralyq baıqaýshylar qazaqstandyqtardyń joǵary belsendiligin, yntymaqtastyǵyn atap ótti. Saılaý ashyq jáne demokratııalyq jaǵdaıda ótti. Ádettegideı, sizder biz - naqty isterdiń partııasy ekendigimizdi rastaı alatyndaryńyzǵa senimdimin», dedi Elbasy.
