Qazaq jazýshysynyń týyndysy aǵylshyn tilinde jaryq kórdi
О́zindik qoltańbasymen qalam terbep júrgen Dıdar Amantaıdyń shyǵarmalaryn endi Amazon saıtynan aǵylshyn tilinde oqýǵa bolady. «Gúlder men kitaptar» romanyn aǵylshyn tiline Záýre Bataeva men Angela Hakkila hanymdar aýdardy.
Qazaq jazýshysynyń týyndysy aǵylshyn tilinde jaryq kórdi
О́zindik qoltańbasymen qalam terbep júrgen Dıdar Amantaıdyń shyǵarmalaryn endi Amazon saıtynan aǵylshyn tilinde oqýǵa bolady. «Gúlder men kitaptar» romanyn aǵylshyn tiline Záýre Bataeva men Angela Hakkila hanymdar aýdardy.
Dıdar Amantaıdyń birqatar áńgimeleri buǵan deıin de aǵylshyn tiline aýdarylyp, «The Stories of the Great Steppe: «The Anthology of Modern Kazakh Literature» jınaǵyna engizilgen-di. Shyndyǵynda, Dıdar Amantaıdyń atalmysh jınaqqa engen, aǵylshyn tilindegi úsh áńgimesi orys tilindegi aýdarmasynan tárjimalanǵan bolatyn.
Volohonskaıa men Pıverdiń shyǵarmashylyq (ári lıngvıstıkalyq) tandeminiń tabysy Záýre men Andjelanyń birlesip jumys isteýine yqpal etti (Dostoevskıı, Tolstoı jáne Chehov shyǵarmalarynyń aǵylshyn tilindegi jańa aýdarmasynyń avtorlary). Qazaq tili – Záýre Bataevanyń týǵan tili, aǵylshyn tili – Andjelanyń ana tili. Andjela Vıskon ýnıversıtetiniń shyǵys tilderi fakýltetiniń doktoranty, birneshe tildi meńgergen. Túrki tilderinen – túrik jáne qazaq tilderin biledi. Qos avtordyń bul aýdarmalary – qazirgi qazaq ádebıetin aǵylshyn oqyrmandaryna túpnusqalyq aýdarma arqyly tanystyrý baǵytynda jasalǵan alǵashqy qadam.
Záýre Bataeva aýdarma týraly taratqan aqparatynda: «Dıdardy aýdarý ońaıǵa soqqan joq. Ger-aǵanyń – Gerold Belgerdiń sózine júginsek, «Dıdardy oqý – úlken eńbek. Bul ermek te, rahat ta emes». Jumys barysyn Dıdarmen zamandas bolýym biraz jeńildetti. Bizdiń zamandastarymyz – KSRO-nyń sońǵy on jylyndaǵy, ıaǵnı 80-jyldardaǵy, Gorbachevtiń kezindegi kóńili sergek, kókiregi oıaý, erekshe jastar bolatyn. Bul býyn – týrashyl, ádildikti kóksegen urpaq edi. Dıdardyń áńgimeleri osy jastar týraly» dep jazady.
Buǵan deıin de jazýshy, kınodramatýrg Dıdar Amantaıdyń «Qarqaraly basynda» atty proza kitabynyń fransýz, túrik jáne mońǵol tilderine aýdarylǵan tárjime nusqalary 2011-2012 jyldary Parıj, Ankara jáne Ulan-Batyr qalalarynda basylyp shyqqan bolatyn.
Parıjde shyqqan kitapqa «Gúlder men kitaptar» romany enip, onyń alǵysózin aqyn Oljas Súleımenov jazdy. Jalpy, bul kitaptyń Parıjde jaryq kórýine Oljas Súleımenov zor qamqorlyq jasady.
Aýdarmashy Qaısha Tábárikqyzy Dıdar shyǵarmalaryn qytaı tiline aýdara bastady. Alǵashqy úsh áńgimesi Qytaıdyń (天涯) («Tian Ya») «Qııan» atty ádebı jýrnalyna shyǵyp ta úlgerdi.
Qazirgi tańda Dıdar Amantaı shyǵarmalary orys, ıspan, nemis, arab, ıtalıan, parsy, grýzın jáne koreı tilderine tárjimalanyp jatqanyn aıta ketken jón.
Aınash ESALI,
«Egemen Qazaqstan».
ALMATY.
