Jambyl oblysynda sý basýy yqtımal 38 eldi meken anyqtalǵan

Aımaqtar • 20 Qańtar, 2021

Jambyl oblysynda sý basýy yqtımal 38 eldi meken anyqtalǵan

Jambyl oblystyq tótenshe jaǵdaılar departamentiniń bastyǵy, azamattyq qorǵaý polkovnıgi Ermek Mombaev oblys aýmaǵynda sý basýdyń oryn alýy Shý, Talas jáne Asa ózenderiniń arnalarynda sý deńgeıiniń kóterilýi jáne taý bókterindegi eldi mekenderde erigen qar men jańbyr sýlarynan bolýy múmkin ekenin aıtty, dep habarlaıdy Egemen.kz.

Hamıt ESAMAN

Oblys aýmaǵynda 156 gıdrotehnıkalyq qurylǵylar ornalasqan. Onyń ishinde respýblıkalyq menshikte 36, kommýnaldyq menshikte 110 nysan bar.

Sonymen qatar, oblystyń eldi mekenderi men sharýashylyq nysandary úshin qaýip tóndirýi yqtımal 14 sý qoımasy bar eken. Olardyń qataryna «Teris-Ashybulaq», «Tasótkel», «Qaqpatas», «Aqkól», «Yntaly», «Qaraqońyz» sý qoımalary jáne Qyrǵyz Respýblıkasynyń aýmaǵynda ornalasqan «Kırov» sý qoımasy jáne taǵy da basqa nysandar kiredi. «Bul sý qoımalary bógetteriniń buzylýy bolǵan jaǵdaıda 234 myńnan astam turǵyny bar 72 eldimekendi sý basý qaýpi týyndaıdy. Sonymen qatar, sý tasqyny men erigen qar sýlarymen sý basýy yqtımal bolatyn 38 eldi meken anyqtaldy. Sońǵy 5 jyl ishinde sý tasqynymen jáne jerasty sýynyń kóterilýimen baılanysty 7 oqıǵa oryn alǵan. Onyń saldarynan Qordaı, Jambyl, T.Rysqulov aýdandarynda 104 turǵyn úıdiń aýlasy, 25 turǵyn úıdiń ǵımaraty sý astynda qalǵan jáne Jambyl aýdanynan ótetin respýblıkalyq mańyzy bar avtokólik jolynyń 515 shaqyrymynda joldy sý shaıyp ketý qaýpi tóngen», deıdi Ermek Mombaev.

Búginde sý tasqyny qaterin azaıtý maqsatynda «Sý tasqyny qaterleriniń aldyn alý jáne joıý jónindegi 2017-2020 jyldarǵa arnalǵan sharalar kesheni» jol kartasynda oblystyń eldi mekenderin sý tasqynynan jáne erigen qar sýlarynan qorǵaý úshin 26 ýchaskede jaǵalaýdy qorǵaý jumystaryn júrgizý josparlanypty. Al, 2017-2020 jyldary jergilikti bıýdjetten bólingen 192,2 mıllıon teńgege 25 nysan boıynsha jumystar tolyǵymen aıaqtalǵan. Sonymen qatar, Moıynqum, Sarysý, T.Rysqulov, Jýaly, Qordaı sııaqty birqatar aýdandarda ornalasqan ózender men sý qoımalaryna jóndeý, tereńdetý jumystary júrgizilgen. Sol sııaqty, Taraz qalasyndaǵy turǵyn úılerdi, aýlalardy jáne kóshelerdi sý basý oqıǵalaryn boldyrmaý maqsatynda «Qapal», «Qarasý-1», «Qarasý-2», «Seńkibaı», «Úshbulaq», «Túıte», «Bazarbaı» kanaldarynyń arnalary tazartylyp, «Shalǵaı Qarasý» jáne «Taıvan» alqabyndaǵy kanaldary tazalanǵan. «Sý tasqynyna qarsy is-sharalar jospary aıasynda 142 shaqyrym drenaj jáne sýarý kanaldary, 185 shaqyrym aryq jelisi, temir jáne avtomobıl joldarynda 145 kópir jáne 789 sý ótkizý qurylǵylary tazartylyp, 5 gıdrotehnıkalyq qurylystar men 19 retteýshi qurylǵylarǵa jóndeý júrgizildi», deıdi departament bastyǵy. Sondaı-aq, ol Shý-Talas basseındik ınspeksııasy men «Qazsýshar» RMK fılıaly «Tasótkel» jáne «Teris-Ashybulaq» sý qoımalarynan sý aǵyzý monıtorıngin júrgizýde ekenin, Shý-Talas basseındik ınspeksııasymen birlesip Qyrǵyz Respýblıkasynyń Sý sharýashylyǵy jáne melıorasııa departamentimen ózara is-qımyl júrgizilýde ekenin jetkizdi.

Aıta keteıik, sý tasqyny saldaryn joıý úshin jumyldyrylatyn kúshter men quraldar toptamasynyń quramynda 631 adam, 53 birlik tehnıka bar. Sondaı-aq, 10 júzý quraldary men 41 motopompa jasaqtalǵan.

Jambyl oblysy

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz