Qazaqstannyń erler qurama komandasy músheleri arasynda eń úzdik nátıje 60 kılo salmaqta kúsh synasyp júrgen Eldos Smetovke tıesili. Parsy shyǵanaǵynda qandasymyz sátsiz óner kórsetkenimen, buǵan deıin jıǵan upaı qory álemdik reıtıngtegi óz ornyn saqtap qalý úshin jetkilikti boldy. Búgingi tańda Eldos besinshi satyǵa nyq taban tirep tur. Onyń qorjynynda 5 218 upaı bar. Dál osy salmaqta óner kórsetetin Ǵusman Qyrǵyzbaev úzdik ondyqty qorytyndylaýda. Dohadaǵy sátsizdikten keıin ol eki satyǵa tómendedi. Ǵusman 4 186 upaıdy enshileýde. Qazirgi kezde ekeýiniń de Tokıoǵa barýyna tamasha múmkindigi bar. Alaıda Olımpııa oıyndaryna bir salmaq dárejesinde jalǵyz ǵana balýannyń beldesetinin eskergen jón. Iаǵnı aldaǵy týrnırlerde qos qandasymyzdyń arasynan kim kóp upaı jısa, ǵalamdyq dodaǵa sol barady.
66 kılo salmaqta da qos myqty ózara tiresýde. Alaıda dál qazirgi kezde Eldos Jumahanovqa qaraǵanda Erlan Serikjanovtyń kórsetkishi birshama joǵary. Bul kúnderi Erlan (3 583 upaı) 11-orynda tursa, Eldos (2 457 upaı) 25-satyǵa syrǵyp tústi. Sondaı-aq «TOP-10» dzıýdoshynyń qataryna taǵy eki jerlesimiz enip otyr. Olar – Jansaı Smaǵulov (2 930 upaı) pen Islam Bozbaev (2 526 upaı). 73 kılo salmaqta kúresetin Jansaı Masters týrnırinde táýir nátıje kórsetip, besinshi oryndy ıemdendi. Sonyń arqasynda birden jeti satyǵa joǵarylap, qazirgi kezde 19-oryndy enshileýde. 90 kılo salmaqta kúresetin Islam óz ornyn saqtap qaldy. Ol 20-oryndy qanaǵat tutýda. Sonymen qatar Dıdar Hamzanyń da (2 010) Olımpıadaǵa qatyssam degen úmiti bar. 81 kılo salmaqta óner kórsetetin daryndy jas 28-orynǵa turaqtady. Biraq aldaǵy ýaqytta Dıdar namysyn qamshylap, qarqynyn kúrt kúsheıtýge tıis. О́ıtkeni bir top dzıýdoshy ony ókshelep keledi. Eger Dıdar aldaǵy jarystarda da dál qazirgideı kúresetin bolsa, Japonııadaǵy jarystan shet qalýy da múmkin.
О́kinishke qaraı, ózge jerlesterimizdiń qarqyny báseń. Ásirese bizdi alyptardyń jaǵdaıy alańdatady. Máselen, 100 kılo salmaqta Aıbek Serikbaev (893 upaı) 49-orynda tursa, Vıktor Demıanenko (514 upaı) 65-satyda. Asa aýyr salmaqtaǵy elimizdiń eń myqty balýany Erasyl Qajybaı (1 151 upaı) nebári 38-oryndy qanaǵat tutýda. Baıyptap qarasańyzdar, olardyń jıǵan upaılary da tym mardymsyz. Árıne, osyndaı baıaý júrispen alyptarymyzdyń Japonııaǵa jete almaıtyny anyq.
Al qyz-kelinshekterdiń jaı-kúıi jaıynda áńgimeleýdiń ózi qıyn. Dál qazir tek Otgonseseg Galbadrah qana Olımpıada joldamasy ıelik ete alady dep nyq senimmen aıtýǵa bolady. 48 kılo salmaqta beldesetin ol 3 353 upaı jıyp, álemdik reıtıngte 13-oryndy enshileýde. Qalǵandary túrli dodalarǵa úzdiksiz qatysqanymen, alǵashqy aınalymdardan asa almaı júr. Toqeterin aıtsaq, Galbadrahtan basqa Qazaqstannyń qyzdar qurama komandasynyń ózge músheleri, tipten «TOP-40» dzıýdoshynyń qataryna da ene alatyn emes.
Al qazirgi kezde sporttyń bul túrinde qaı memleketter ókilderiniń qarqyny kúshti degen saýal týyndasa, oǵan aıtar jaýabymyz daıyn. Máselen, álemdik reıtıngte «TOP-10» dzıýdoshynyń qatarynda Japonııanyń toǵyz birdeı ókili bar. Osy jaıttyń ózi-aq Kúnshyǵys eliniń qyzdary áli de tuǵyrdan taımaǵanyn ańǵartsa kerek. Árıne, oǵan tańdanýǵa bolmas. Sebebi Japonııa – dzıýdo kúresiniń otany. Jáne de japonııalyq balýandar qandaı jarysqa qatyssa da, únemi bıik tuǵyrlardan kórinedi.
Grýzııa men Reseı quramalary ekinshi jáne úshinshi oryndardy ózara bólisýde. Olardyń árqaısynyń alty balýany joǵarydaǵy tizimde. Izraıl men Nıderland dzıýdoshylarynyń da jaǵdaıy jaman emes. Myqtylar qatarynda atalǵan memleketterden bes balýannan bar. Sondaı-aq álemdik reıtıngtiń úzdik ondyǵynda mynda eldiń ókilderi tirkelgen. Ońtústik Koreıa – 4, Mońǵolııa, Brazılııa, Ázerbaıjan, Kanada, Túrkııa – 3, Qazaqstan, О́zbekstan – 2, Ispanııa, Taıpeı, Italııa, Shvesııa, Kosovo, Belgııa, Germanııa, Bolgarııa, Kýba, Serbııa, Majarstan, Chehııa, Portýgalııa jáne Ýkraına – 1.
Álemdik reıtıngte kósh bastap turǵan dzıýdoshylar
60 kılo: 1. Rıýdzıý Nagaıama (Japonııa), 2. Robert Mshvıdobadze (Reseı), 3. Naohısa Takato (Japonııa).
66 kılo: 1. Manýel Lombardo (Italııa), 2. Vaja Margvelashvılı (Grýzııa), 3. Dzıosıro Marýıama (Japonııa).
73 kılo: 1. Soıchı Hasımoto (Japonııa), 2. Rýstam Orýdjev (Ázerbaıjan), 3. An Chang Rım (Ońtústik Koreıa).
81 kılo: 1. Mattıas Kass (Belgııa), 2. Sagı Mýkı (Izraıl), 3. Shota Grıgalashvılı (Grýzııa).
90 kılo: 1. Nıkolos Sherazadashvılı (Ispanııa), 2. Noel van ’tEnd (Nıderland), 3. Ivan Fılıpe Sılva Morales (Kýba).
100 kılo: 1. Varlam Lıpartelıanı (Grýzııa), 2. Peter Palchık (Izraıl), 3. Jorje Fonseka (Portýgalııa).
+100 kılo: 1. Lýkas Krpalek (Chehııa), 2. Inal Tasoev (Reseı), 3. Gýram Týshıshvılı (Grýzııa).
