«Dostar, keshe keshke maǵan aıyptar taǵylyp jatqany týraly estidim. Meniń oıymsha, mundaı jańalyq kezekti startqa daıyndyq júrgizip jatqan árbir atlet úshin kútpegen jaǵdaı bolady.
Meni tyıym salynǵan nárseni qoldandy dep aıyptap jatqan joq. Kez kelgen kásibı sportshy sııaqty, men maýsym boıy dopıngke birneshe ret test tapsyramyn, nesep taldaýymda ne bolǵany belgisiz, ol bizdi tekseretin testileý organdarynyń jaýapkershiligi.
Dostar, men ózgelerdiń kinásin óz moınyma alýǵa nıetti emespin. Myńdaǵan qazaqstandyqtyń menimen birge qýanǵan sátteri meni árqashan jigerlendirdi! Sizder meniń adal dosymsyzdar, búgin meni qoldaıtyndaryńyzǵa senimdimin. Men sport adal bolsa deımin.
Endi men Halyqaralyq testıng agenttigine túsinikteme berýim kerek, onda men joǵaryda jazǵanymnyń bárin aıtamyn», dep jazdy sportshy Instagram jelisindegi paraqshasynda.
Halyqaralyq dopıng-testileý agenttiginiń (ITA) sheshimine sáıkes, Rahımov 2016 jyly dopıng tekserý úshin tapsyrǵan nesep taldaýyn aýystyrdy degen kúdikke ilindi. Sol jyly ol Rıo-de Janeırodaǵy Olımpıada chempıony bolǵan.
