Vedomstvonyń málimetinshe, 2020 jyldyń 14 aqpanynda saǵat 15:00-de Jaqsy kentiniń mańynda, «Ekaterınbor-Almaty» avtojolynyń 917 shaqyrymynda «Qaýipsiz jol» jedel aldyn alý is-sharasyn ótkizý barysynda Aqmola oblysy Polısııa deparatamentiniń patrýldik polısııa batalonynyń 4-vzvod ınspektorlary «Chevrolet Aveo» markaly avtokóligin toqtatqan. Kólik rýlinde Jaqsy kentiniń 24 jastaǵy turǵyny bolǵan. Keıin anyqtalǵandaı, er adam Jaqsy aýdandyq sotynyń úkimimen alkogoldik jáne esirtkige masań kúıde rýlge otyrǵany úshin úsh ret kólik júrgizý quqyǵynan aıyrylǵan.
Polısııa qyzmetkerleri Ákimshilik quqyq buzýshylyqtyń jolyn kesý jáne adamdardyń ómiri men densaýlyǵyna tikeleı qaýiptiń aldyn alý úshin tártip buzýshyny Jaqsy aýdanynyń polısııa bóliminiń ǵımaratyna jetkizdi. Polısııa qyzmetkeri er adamǵa qatysty ákimshilik quqyq buzýshylyq týraly hattama jasady, ıaǵnı kólik quralyn júrgizý quqyǵynan aıyrylǵan júrgizýshiniń kólik quralyn basqarýy boıynsha. Hattama jasaý barysynda «Chevrolet Aveo» markaly avtokóligi Arshaly aýylynyń 40 jastaǵy turǵynyna tıesili ekeni anyqtaldy.
Er adamnyń buryn kólik quralyn basqarý quqyǵynan aıyrylǵanyn, avtomobıldiń menshik ıesi bolmaǵanyn jáne ózimen birge kólik quralyna arnalǵan tirkeý jáne zańnamada belgilengen ózge de qujattary joq ekenin eskere otyryp, tártip saqshylary Ákimshilik quqyq buzýshylyq kodeksiniń 785, 796 jáne 797-baby birinshi bóliginiń 1) tarmaqshasynyń talaptaryna sáıkes, Ákimshilik quqyq buzýshylyq týraly is boıynsha is júrgizýdi qamtamasyz etý sharalaryn qabyldady. Kólik quralyn basqarýdan shettetý hattamasy jasaldy. Odan keıin polıseıler ýaqytsha saqtaý úshin arnaıy turaqqa ornalastyrý úshin «Chevrolet Aveo» avtokóligin alý aktisin jasaı bastaıdy.
Osy kezde qaskúnem polısııa bóliminiń ǵımaratynan syrtqa júgirip shyǵyp, «Chevrolet Aveo» avtokóliginiń rýline otyrady. Onyń artynan ilese shyqqan tártip saqshysy toqtatpaq bolady. Er adam polısııa ınspektoryn qaǵyp, ol kapottyń ústine qulaıdy. «Saraptama nátıjeleri boıynsha onyń kanabıoıdtardy (marıhýana) qoldanǵany anyqtaldy», - deıdi vedomstvodan. Eń qyzyǵy, quqyq buzýshy bolyp jatqannyń bárin uıaly telefonnyń beınekamerasyna túsirgen. Tipti, ózin ustaý kezinde de túsirýin toqtatpaǵan.
«Atalǵan fakti boıynsha sot sheshimimen 24 jastaǵy sottalýshy Qylmystyq kodekstiń 380-baby (bılik ókiline qatysty zorlyq-zombylyq qoldaný) jáne Qylmystyq kodekstiń 378-baby (bılik ókilin qorlaý) boıynsha kináli dep tanylyp, bes jylǵa bas bostandyǵynan aıyryldy», dep tolyqtyrdy vedomstvodan.
