Myqtylar Melbýrnde bas qosady

Aýstralııanyń ashyq birin­shiliginiń tusaýy sonaý 1905 jyly kesildi. Ýaqyt ozǵan saıyn aıtýly jarystyń mereıi ósip, mártebesi arta tústi. Osy týrnır arqyly talaı oıynshy tórtkúl dúnıege tanylyp, álemdik sport tarıhyna óz esimderin altyn áriptermen jazdy.

Statıstıkalyq málimetterge júginsek, talaı qyzyqty derekterge qanyq bolamyz. Máselen, erler arasynda bas júldeni eń kóp oljalaǵan Novak Djokovıch ekenin jankúıerler jaqsy biledi. Serbııanyń saıypqyrany segiz ret teńdessiz dep tanyldy. Bul beles Shveısarııanyń maqtanyshy Rodjer Federerge alty márte baǵyndy. Erterekte Roı Emerson esimdi myqty tennısshi boldy. О́tken ǵasyrdyń alpysynshy jyldary jasyl qurlyqtyń ókili alty birdeı týrnırde top jaryp, kópshiliktiń qoshemetine bólendi.

Áıelder jaıynda aıtar bolsaq, rekordtyq kórsetkish Margaret Kort-Smıtke tıesili. Aýstralııalyq tennısshi 1960-1973 jyldar aralyǵynda aldyna jan salmaı, bas júldeni 11 márte oljalady. HH ǵasyrdyń alǵashqy jartysynda taǵy bir jergilikti oıynshy Nensı Ýınn-Bolton alty ret qarsylas shaq keltirmese, búgingi tańdaǵy teń­dessiz tennısshilerdiń biri Serena Ýılıams jeti márte jeńimpaz atandy.

Byltyrǵy týrnırdiń erler arasyndaǵy fınalynda serbııalyq Novak Djokovıch pen aýstrııalyq Domınık Tım kúsh synasty. Bul tartys 6:4 4:6 2:6 6:3 6:4 esebimen alǵashqysynyń paıdasyna sheshildi. Áıelderdiń sheshýshi saıysynda amerıkalyq Sofııa Kenın men ıspanııalyq Garbıne Mýgýrýsa sheberlik baıqasty. Bul tartysta AQSh tennısshisiniń mereıi ústem boldy – 4:6 6:2 6:2.

Qazaqstandyq tennısshiler de Melbýrnde jıi boı kórsetip júr. Jerlesterimizdiń arasynda eń úzdik kórsetkish Mıhaıl Kýkýshkınge tıesili. 2012 jyly ol tórtinshi aınalymǵa deıin jetti. Bastapqy básekelerde ıspanııalyq Gılermo Garsııa Lopes, serbııalyq Vıktor Troıskı jáne fransııalyq Gael Monfısti utqanymen, otandasymyzdyń Ulybrıtanııanyń áıgili tennıs­shisi Endı Marreıge áli jetpedi. Dál sol týrnırdi Andreı Golýbev te keremet bastap edi. Tusaýkeser kezdesýinde ol Reseıdiń ataqty oıynshysy Mıhaıl Iýjnyıdyń ózin jolynan yǵystyrdy. Biraq kelesi kezeńde fransııalyq Rıshar Gaskege ese jiberdi. Sol sekildi qyzdarymyz da bul jarys­ty «qatyrmady». Ár jyldary Ga­lına Voskoboeva (2009, 2012), Iаros­lava Shvedova (2015), Zarına Dıas (2015, 2016, 2020), Iýlııa Pýtınseva (2016, 2020) jáne Elena Rybakına (2020) úshinshi aınalymda óner kórsetti. Alaıda odan árige eshqaısy bara almady.

Aýstralııanyń ashyq birin­shiligi bul joly da tartysty bo­la­tynyna esh kúmánimiz joq. Aıtýly jarysta Qazaqstannyń alty tennısshisi óner kórsetedi. Olar – Elena Rybakına, Iýlııa Pýtınseva, Zarına Dıas, Iаro­slava Shvedova, Aleksandr Býb­lık jáne Mıhaıl Kýkýshkın. Osy «Úlken dýlyǵa» týrnırinde jer­les­terimizge úlken tabys tileımiz.