Osylaısha, shetelden qarjy aýdarymyn jasaý júıesin paıdalanýshy qazaqstandyqtar sany ekinshi jyl qatarynan azaıǵan. Bıyl qańtar-qarashada eń kóp qarjy aýdarymdary Reseıden kelgen: 67,9 mlrd teńge. Sonyń ózi 2019 jyldyń qańtar-qarashasymen salystyrǵanda 43,7 paıyzǵa az. Qazaqstan aýdarymdaryndaǵy Reseıdiń úlesi bir jyl ishinde 38,1 paıyzdan 26,3 paıyzǵa azaıyp ketken. Ekinshi orynda Ońtústik Koreıa tur. Atalǵan elden Qazaqstanǵa bıyl 47,1 mlrd teńge aýdarylypty. Aýdarym kólemi 21,7 paıyzǵa qysqarǵan. Al О́zbekstan men Qyrǵyzstannan elimizge aýdarylǵan qarjy kólemi kerisinshe, 16,3 jáne 12,3 paıyzǵa artqan.
Aqsha aýdarymdary júıesiniń arasynda ádettegideı «Zolotaıa Korona» kósh bastaıdy. Bul júıe arqyly 125,5 mlrd teńge jiberilgen. Bul soma barlyq aýdarymdar kóleminiń teń jartysyn quraıdy. Odan keıingi oryndarda Western Union (61,7 mlrd tg) jáne MoneyGram (31,1 mlrd tg) júıeleri ornalasqan.
Eske salaıyq, «Zolotaıa Koronanyń» álemniń 34 elinde 50 myńnan astam qyzmet kórsetý bólimshesi bar. Qarjyny qolma-qol túrde (servıs seriktesteriniń bólimshelerinde, bankterdi qosa eseptegende) jáne onlaın túrde (saıtta arnaıy formany toltyrý arqyly) joldaýǵa bolady. Qabyldap alýshy azamat operasııa aıaqtalǵan soń sanaýly mınýttardan keıin qarajatqa qol jetkize alady. Az somaǵa komıssııa alynbaıdy. Valıýta kýrsyn júıeniń ózi anyqtaıdy.
